Бұл жолы да Президент қара орман халықты толғандырған көп мәселелерді қаузады. «Абай өзінің «толық адам» тұжырымын мирас етсе, әл-Фараби «бақытқа жету жолындағы қайырымды қоғам» қағидасын өсиет етіп қалдырды. Ұлы ойшылдардың әділдік пен ізгілік жөніндегі ұстанымы баршаға белгілі. Менің «Халық үніне құлақ асатын мемлекет» атты тұжырымдамам осы қағидалармен үндеседі», дейді Мемлекет басшысы.
Менің ұғымымда ұлыларды ұлықтау, олардың еңбегі мен есімін жаңғырту ұрпақ үшін өнегелі өріс болуға тиіс. Әл-Фараби, Абай тойларының берері де, бедері де сол ұлылыққа жақындау.
Бұл тойлардың Абайша айтқанда, «босқа мал шашпақ емес», өркениеттің өріне бастар ұлағатымен мәңгі есте қалғаны абзал. Сонау бір жылы украинның ұлы ақыны Тарас Шевченконың күндеріне қатысқаным бар. Каневтегі Тарас жерленген биікте мыңдаған халықты көрдім. Қара тасты аялап, мінәжат еткен елді көрдім. Жұрттың ұлылыққа тағзым етіп, шын махаббатпен жарыса Тарас жырларын оқығанына тебірендім. Сонда тұрып: «Шіркін, біздің Абайдың Жидебайы қазақ баласы табынып барар, сағынып барар орынға айналса ғой», деп армандаған сәтім еске түсіп отыр.
Абай, әл-Фараби – мәңгілік өнеге. Адамзат баласы ақыл-ой арманына түскен мынау алмағайып дүниеде бұл есімдер екі жұлдыз секілді жарқырай береді.
Ұрпақты ұлылықтың ұлағатын сезіне алардай тәрбиелесек, қасиетті қазақ жұртының да бақ-талайы жанбақ. Даңғазалық пен бос мақтанның уақыты өткенін осы мақаланың өн бойынан байқадым. Той өткізудің де жаңа формаларын іздеу керек шығар.
Ел басшысы парасат биігінен ой толғапты. Жүрекке жетер қарапайым қағида.
Ғалым ЖАЙЛЫБАЙ,
ақын, Қазақстанның еңбек сіңірген қайраткері