Қазіргі таңда қалада 200-ге жуық соғыс ардагері мен 14 мыңнан астам тыл майданының қатысушылары тұрады. Әскери қызметшілер олармен тығыз байланыста, хал-жағдайларын біліп отырады, тұрмыстарына көмек көрсетеді.
Жеңіс күні қарсаңында әскери қызметшілер құттықтап қайтқандардың қатарында Алматы және Алматы облысының құрметті азаматы, «Казахстанская правда» газеті атындағы халықаралық майдандық клубының президенті, гвардия полковнигі Леонид Гирш, Қазақ КСР халық әртісі, Мемлекеттік сыйлықтың лауреаты Юрий Померанцев, соғысты басынан өткеріп, кейін қарапайым сарбаздардың ерліктерін өзінің туындыларында бейнелеген жазушы Әбдіжәміл Нұрпейісов те бар.
Сонымен қатар Нұр-Cұлтанда әскери қызметшілер Ұлы Отан соғысындағы Жеңістің 75 жылдығымен ардагерлерді құттықтап, тұрғын үйлердің аулаларында концерттер қойды.
Ұлттық әскери-патриоттық орталығының Орталық ансамблі әртістері патриоттық шығармалар мен соғыс жылдарының әндерін орындады, қала көшелерімен автокөлікпен жүріп өтіп, тұрғын үйлердің аулаларына кіріп, мерекенің басты батырлары – ардагерлер мен жергілікті тұрғындарды құттықтады. Көрермендер қойылған концертті жақсы бағалап, әскери әртістерге алғыстарын білдірді. Одан басқа Ақмола гарнизонының әскери қызметшілері үйде отырған ардагерлердің жағдайын сұрап қайтты.
