Ұйымдастырушылар орталық тарихи-мәдени мұраны сақтау, насихаттау саласында волонтерлермен жұмыс істеу, волонтерлердің басын қосып, шеберлік сағаттарын өткізуді мақсат ететінін айтты. Орталықтың жұмысы халық арасында волонтерлік қозғалысты дамытуға да кеңінен жол ашпақ. «Жамбыл облысының тарихи-мәдени мұраларына қызығушылық танытатын волонтерлер орталыққа келіп, ақыл-кеңеске жүгіне алады», дейді ұйым қызметкерлері.
Аталған орталықта волонтерлерге арналған семинар-тренингтер, оқу курстары жиі өткізілмек. Онда аймақ жастары өзін-өзі дамытуға, біліктілікті арттыруға мүмкіндік алады. Волонтерлермен жұмыс істеуде тәжірибесі мол маман Айжан Алебаева орталық басшысы болып тағайындалды.
Ұйымның жұмыс бағыттары белгілі. Басшының сөзіне сүйенсек, волонтерлер археологиялық-қазба жұмыстары, реставрациялық жұмыстар, туризм бағытындағы гид волонтерлер, мәдени нысандарға мониторинг жүргізу бағыттары бойынша даярланады.
Алдағы уақытта дәл осындай орталықтарды Түркістан, Қарағанды облыстарында да ашу жоспарланған. Бұл бастама «Жас Ұлан» бірыңғай балалар мен жасөспірімдер ұйымы» РҚБ, Ақпарат және қоғамдық даму министрлігі, «Азаматтық бастамаларды қолдау орталығы» КеАҚ қолдауымен жүзеге асырылды.