Қарағандылық құтқарушылар аталған ауданның Фирдоуси және Жеңіс ауылдарында суды сору арқылы ағызу және бағытын басқа жаққа бұру жұмыстарымен айналысуда. Олар төрт күннің ішінде 15 үйдің маңындағы аумақтан 110 мың текше метрден астам суды сорып, топырақты құрғатқан.
Құтқарушылар тәулік бойы екі ауысыммен жұмыс істеуде.
Еске салар болсақ, Қарағандыда жасақталған құтқарушы топ 9 мамырға қараған түні авариялық-құтқару және кезек күттірмейтін жұмыстарды жүргізуге көмек көрсету үшін Түркістан облысына жеткен болатын. Олар сол күні таңертең Мақтаарал ауданының Фирдоуси ауылында су ағызу жұмыстарына бірден кірісіп кеткен екен.
