Елорданың білім басқармасы мектеп бітіру кештеріне тыйым салды

Қоғам • 19 Мамыр, 2020

Елордада мектеп бітіру кештеріне тыйым салынды

45 рет көрсетілді

Аттестат тапсыру оқу орындарының аулаларында өтеді. Одан кейін түлектер мектеп жылдары туралы естелік ретінде ағаш отырғызады. Бұл туралы Нұр-Сұлтан қаласы әкімдігінің ресми сайты хабарлады.

Egemen Qazaqstan

«2019-2020 оқу жылының қорытындысы бойынша 6 515 елордалық оқушы аттестат алады. Салтанатты рәсім 3 маусымда қаланың барлық орта оқу орындарында өтеді. Елордада карантин режимінің сақталуына байланысты аталған іс-шаралар барлық санитарлық нормаларды сақтай отырып, мектеп аулаларында өтеді. Оқушылар рәсімге мектеп формасымен қатысады. Аттестат тапсырғаннан кейін «түлектер аллеясында» көшет отырғызу акциясы жоспарланған. Нұр-Сұлтан қалалық білім басқармасы бітіру кештерін өткізуге қатаң тыйым салынатындығын ескертеді», – деді қалалық білім басқармасының баспасөз хатшысы Алтынай Зарлыққызы.

Биыл 6 199 елордалық оқушы немесе оқушылардың жалпы санының 95%-ы ұлттық бірыңғай тест (ҰБТ) тапсырады. Оның ішінде 3 665 қазақ, 2 495 орыс, 39 ағылшын тілінде. Бұл ретте ҰБТ өткізу форматы өзгеріссіз қалады: ұзақтығы 3 сағат 50 минут тест екі блоктан – 3 негізгі пән (20 тапсырма) және 2 бейіндік пәннен (30 тапсырма) тұрады. ҰБТ-ға 11-ші сыныптың төртінші тоқсанының тапсырмалары енгізілмейді.

Карантин режимін ескере отырып, тест басталар алдында емтихан тапсырушылардың температурасы өлшеніп, оқушылар арасында қауіпсіз қашықтық сақталады. Сондай-ақ қосымша санитарлық шаралар қабылданады.

Бұдан басқа оқушыларды ҰБТ өтетін жерге тегін жеткізу қамтамасыз етіледі. Ата-аналар өз балаларының уақытында келуін және қауіпсіздігін қамтамасыз етуге міндетті. ҰБТ басталғанға дейін үй-жайлардың өртке қарсы қауіпсіздігі тексеріледі, медициналық көмек және құқықтық тәртіпті қорғау ұйымдастырылады. Биыл «Алтын белгіге» 359, үздік аттестатқа 379 түлек үміткер.