Осынша күн үйіне келмеген баласы үшін алаңдаған анасы Қызылқоға аудандық полиция бөлімінен көмек сұрады. Бейбіт күнде ұшты-күйлі жоғалған жасөспірімді іздеуге аудандық полиция бөлімінің, округтердегі полиция бөлімшелерінің жеке құрамы жұмылды. Кәмелетке толмаған баланы жан-жақты іздестіру үшін топ-топқа бөлінген сақшылар аудан аумағындағы ауыл-селоларды түгел тінтіп, далалық жолдарды да назардан тыс қалдырмады.
– Полиция бөлімінің учаскелік полиция инспекторы, полиция капитаны А.Сәрсенғалиев, кәмелетке толмағандар ісі жөніндегі инспектор, полиция майоры Б.Байжан, патрульдік полиция аға инспекторы, полиция капитаны Ж.Аманжолов, анықтаушы, полиция лейтенанты О.Еламан, жедел уәкіл, полиция капитаны Ш.Наурызғалиев баланы Миялыдан 4-5 шақырым жердегі далалық жол бойынан тауып, анасына тапсырды, – деп хабарлады полиция департаментінің баспасөз қызметі.
Жоғалған жасөспірімнің анасы – 1976 жылғы азаматшаның айтуынша, ұлының үйде жоғына алғашқыда соншалықты мән бермепті. Ұлын атасының үйіне кеткен болар деп ойлағанын жасырмайды. Өйткені жасөспірім бұрын да отбасындағыларға айтпастан, аудан орталығынан 100 шақырым қашықта орналасқан Қарабау елді мекеніндегі атасының үйіне жиі барады екен.
– Бұл жолы да солай болар деп ойладым. Бірақ Қарабаудағыларға телефон шалғанда, оның келмегенін білдім. Баруы мүмкін-ау деген болжаммен, барлық туған-туыстардан сұрастырып, төрт күн бойы іздестірдім. Амалым таусылғасын, полицияның көмегіне жүгіндім, – дейді төрт күннен кейін табылған жасөспірімнің анасы.
Ал жоғалып-табылған баланың айтуынша, үйінен шығарда жылы киімін, арқаға асатын сөмкесіне азық-түлік салып алыпты. Күндіз далада «қыдырып» жүргенде, бұл бала не іздеді екен?
Атырау облысы
