Жамбыл облысында қант қызылшасын еккендердің қарызы өтелуде

Аймақтар • 22 Мамыр, 2020

Жамбыл облысында қант қызылшасын еккендердің қарызы өтелуде

26 рет көрсетілді

Қант қызылшасын егетін шаруалар мен «Меркі қант зауыты» кәсіпорнының арасындағы қаражат мәселесіне байланысты дау әлі шешілмей келеді.

Хамит ЕСАМАН

Аталған мәселеге орай, Жамбыл облысының әкімі Бердібек Сапарбаев өңірдегі қант қызылшасын өсірумен айналысатын шаруа қожалық тағы да басшыларымен кездесті. Кездесу барысында «Меркі қант зауыты» ЖШС-нің ауылшаруашылық тауар өндірушілері алдындағы берешегін өтеу, сондай-ақ, қант өндіру саласын одан әрі дамыту және қолдау мәселелері өзара талқыланды.

«Біз «Меркі қант зауытының» басшылығымен келіссөздер жүргізіп жатырмыз. Бұл мәселені шешу үшін бюджеттен 180 миллион теңге бөлінді. Біздің алғашқы кездесуімізде қант зауытының қарызы 1 миллиард теңгеден асатындығы айтылған. Бүгінге дейін сіздерге 640 миллион теңгеден астам қаржы төленсе, зауыт басшылығы келесі аптада тағы 135 миллион теңгені өтейтіндігіне сендіріп отыр. Бұл мәселе біздің бақылауымызда болады», деді Бердібек Сапарбаев. Сонымен қатар, ол фермерлерді бірігуге шақырып, қызылша өсірушілер қауымдастығын құруды ұсынды. «Біз сіздерді әрқашан қолдап келдік, алдағы уақытта да қолдайтын боламыз. Өз кезектеріңізде сіздердің де бірігіп, қауымдастық құрып, егіс алқабын көбейтулеріңіз маңызды. Облыс аудандарынан бірнеше қант шығаратын шағын зауыттардың құрылысын салуды қарастыру қажет. Бұл істе сіздерге «Тараз» әлеуметтік-кәсіпкерлік корпорациясы қол ұшын береді. Біздің міндетіміз – бүкіл Қазақстанды қантпен қамтамасыз етіп қана қоймай, сонымен қатар экспортқа өнім шығару», - деді Бердібек Сапарбаев.

Жамбыл облысы

Күннің маңызды және өзекті жаңалықтарын «Егемен Қазақстан» телеграм каналынан оқыңыз