Қарағандыда қазақтың үш биіне ескерткіш қойылды

Аймақтар • 22 Мамыр, 2020

Қарағандыда қазақтың үш биіне ескерткіш қойылды

171 рет көрсетілді

Кеншілер астанасындағы Қарағанды облыстық сотының жаңа ғимаратының алдына Төле, Әйтеке және Қаздауысты Қазыбек билерге ескерткіш қойылды.

Қайрат Әбілда

Ескерткіштің орнатылуына облыстық соттың төрағасы Нұрсерік Шәріпов бастамашы болған. Үш бидің қоладан құйылған мүсінін халық шебері Жеңіс Еркінұлы Алматы қаласында төрт айдың ішінде жасап шығарыпты.

«Үш би» мүсіндік композициясының ашылу салтанатына облыс әкімі Жеңіс Қасымбек қатысып, құттықтау сөз сөйледі. «Бұл ескерткіш сот төрелігінің нышаны ретінде Қазақстан халқы алдындағы судьялардың жауапкершілігін еске салып отырады», деді ол.

Қарағанды облыстық сотының төрағасы ескерткіштің сот сарайының архитектуралық ансамблімен біріктіріліп жоспарланған атап өтті.

– Үш ұлы би тарихымызға қоғам және саяси қайраткерлер ретінде енген. Олар тек бітімгер судьялар ғана емес, хандардың кеңесшілері де болды. Билердің кеңесін басқарды. Олар бай өмірлік тәжірибесі бар, қазақ халқының тарихын, дәстүрін білетін дана адамдар болды. Әйгілі билеріміздің негізгі міндеті қоғамдағы тұрақтылықты сақтау еді. Олар риторика, наным шеберлігіне ие болған. Біз осы күнге дейін олардың нақыл сөздеріне, өсиеттеріне сүйенеміз, – деді ол.

Сонымен қатар, облыстық соттың төрағасы үш бидің осы уақытқа дейінгі танымал болған образын қайталамауға тырысқандарын айтады.

«Динамиканы көрсеткіміз келді. Бұл ғасырлар бойы келе жатқан дәстүрлерге қарап, ұрпақтар көзқарастарын қалыптастыру үшін жасалған дүние», дейді Нұрсерік Шәріпов.

Ескерткіштің ашылу салтанатына қатысқан ардагер-судьялар гүл шоқтарын қою рәсімінен кейін, облыстық сот былтырғы жылдың қараша айында қоныстанған жаңа ғимаратты аралап көрді.

Даналық пен әділеттіліктің символы болуға қызмет етуге тиіс бұл ескерткіш Қарағанды облысындағы жеке тұлғаларға арналған тұңғыш мүсіндік композиция.

Қарағанды облысы

Күннің маңызды және өзекті жаңалықтарын «Егемен Қазақстан» телеграм каналынан оқыңыз