Осындай жиынтықтар адам өміріне оттан, судан, жол апатынан қауіп төнген кездерде құтқаруға көмек береді. Мәселен, жол апатынан аударылған машинаның есігі ашылмай қалғанда ішіндегі адамды құтқару үшін қатты шыныны сындыратын ауыр балғаның қажеттілігі өте зор. Сондай-ақ суға батып бара жатқан адамды құтқаруда суға батпайтын дөңгелектің де пайдасы мол.
Өткен жылы Солтүстік Қазақстан облысының полицейлері төтенше жағдайға түсіп қалған ондаған адамға қол ұшын созды. Тәртіп сақшылары көп жағдайда оқиға орнына алғашқылардың бірі болып барады, сондықтан оларға өрт кезінде, суда және басқа да төтенше жағдайлар кезінде көмек көрсетуге тура келеді. Мәселен, былтырғы тамызда патрульдік полиция қызметкерлері жертөлеге түсіп, ес-түссіз жатқан Петропавл қаласының екі тұрғынын алып шығу кезінде арқан мен шамның пайдасы зор болды.
Биыл Полиция департаменті патрульдік полицияның барлық экипаждарын қосымша құтқару құралдарымен жабдықтауды жоспарлап отыр. «Аталған құралдар полиция қызметкерлерінің жұмысына елеулі септігін тигізеді. Қызметкерлер жолда жүргізушілерге көмектесіп тұрады, көліктердің өртеніп жатқан жағдайлары да болды. Сондай-ақ инспекторлар жол апаты кезінде адам өмірлерін де құтқарды. Бұндай жағдайларда құтқару жиынтықтары аса қажет», - деп атап өтті Полиция департаменті патрульдік полиция батальонының командирі полиция подполковнигі Ерлан Мәдиев.
ПЕТРОПАВЛ
