Коронавирус смартфон нарығына қалай әсер етіп жатыр?

Технология • 23 Мамыр, 2020

Коронавирус смартфон нарығына қалай әсер етіп жатыр?

338 рет көрсетілді

Коронавирус пандемиясы мен оның салдарлары экономиканың барлық саласына салқынын тигізіп жатыр. Дүниежүзілік дағдарыстың ауылы алыс емес деген сарапшылардың пікірлерін оқып та, біліп те жүрміз. Әлбетте, бірен-саран онлайн конференция қызметін ұсынатын it-компаниялар табыстың астында қалып жатқан болар? Бірақ күллі әлем қиналса, олардың пайдаға шаш етектен батқаны не керек?

Serikqazy KÓKENAI

Бәріміздің елеңдеп қарайтын смартфон нарығы осы жағдайды қалай бастан өткеріп жатыр екен? Осы салада зерттеу жұмыстарымен айналысатын Canalys компаниясы әлемдік нарықта биылғы бірінші тоқсандағы смартфон сату 13%-ға төмендегенін айтып отыр. Санмен келтірсек, бұл 272 млн дана смартфон деген сөз.

Әйгілі Samsung ең көп зиян шегіп жатыр. Бұл компанияның смартфон сату көрсеткіші 17%-ға азайып, 60 млн данаға түскен. Екінші орындағы зиян шегуші қытайлық Huawei 49 млн шамасында (17%-ға аз) гаджет сатып, Google компаниясының санкциялары мен шектеулеріне пысқырмай отыр. Бұл жерде Қытайдың ішкі нарығы үлкен септігін тигізуде. Атышулы Apple 37 миллиондық көрсеткішпен үшінші орында. Стив Джобс ізбасарларының сатылымға шыққан смартфондар саны 8 пайызға азайған. Келесі төртінші және бесінші орындарда қытайлық компаниялар. Алпауыт Xiaomi 30 млн құрылғы сатып, оның саны керісінше 9%-ға артса, Vivo компаниясының 24 млн гаджеті сатылып кеткен, әрі 3 пайыздық өсім бар.

Canalys компаниясының аналитигі Бена Стәнтонның пікірінше бұл көрсеткіштер дағдарыс жағдайында әлемдік брендтер үшін көңілге қонымды екенін айтуда. Былтырғы флагмандар мен танымал смартфондар жақсы сатылуда екен. Биылғы жылдың бірінші тоқсанында IPhone 11, Xiaomi Redmi Note 8T және Samsung A51 сияқты гаджеттер өте жақсы сатылған. Дегенмен де, смартфонды байлықтың белгісі ретінде сатып алғысы келгендер оны кейінге қалдыруға мәжбүр болған екен.

Коронавирус алғашында тек Қытайда ғана белең алғанда Samsung өз құрылғыларын Корея мен Вьетнамда шығарып жол тапты. Бірақ кейінірек ауру кең тарала бастағанда сатылым азайған. Apple болса, IPhone 11 смартфонының аса қатты танымалдылығы арқасында сатылым деңгейі тым көп түспеді. Биылғы IPhone SE сериясы да компанияның стратегиялық тұрғыдан дұрыс шешімі болып, өнімді сәтті өткізуде пайдасын тигізді.

Huawei түрлі санкцияларға қарамастан смартфонды шығарып та, сатып та пайдасын жақсы тапты. Оған қоса Google сервистері болмаса да Р40 флагманын шығарды.

2020 жылдың алғашқы тоқсанында карантиндік жағдайда бұрын офлайн жұмыс істейтіндер онлайн саудаға көшті. Мұндай режимге үйренбегендер дүкендер үшін бұл логистикалық тұрғыда қиындық туғызып, тауардың қымбаттауына әсер еткен.

Енді екінші тоқсанда коронавирустың шарықтау шегі болуы мүмкін болғандықтан жоғарыдағы көрсеткіштер тағы төмендеуі әбден ықтимал. Бірақ кейбір Еуропа елдері бірқатар шектеулерді алып тастап, үміт отын ұялатып та отыр.

Күннің маңызды және өзекті жаңалықтарын «Егемен Қазақстан» телеграм каналынан оқыңыз