Сапар кезінде Е.Тоғжановпен бірге делегация құрамында Мәдениет және спорт министрі Ақтоты Райымқұлова, Білім және ғылым вице-министрі Мирас Дәуленов, Қарағанды облысының әкімі Жеңіс Қасымбек және «Назарбаев зияткерлік мектептері» АҚ басқарма төрайымы Күләш Шамшидинова болды.
Қазіргі уақытта Қарағанды облысында «Жұмыспен қамтудың жол картасы» бойынша жалпы сомасы 3,9 млрд теңгеге 36 әлеуметтік және мәдени-тарихи жобасы жүзеге асырылуда. 2020 жылғы 1 мамырдағы жағдай бойынша өңірдегі әлеуметтік жұмыс орындарына 472 адам жіберілді. Оның ішінде 113 адам жастар практикасына, 2 694 адам қоғамдық қызметке тартылған. Жұмыссыздық деңгейі 4,4 пайызды құрайды (2020 жылдың 1 тоқсаны бойынша), өзін өзі жұмыспен қамтығандардың саны – 56,1 мың адам.
Сапар кезінде Премьер-Министрдің орынбасары Алтын Орданың негізін салған Жошы хан тарихи-мәдени орталығының құрылыс барысымен танысты. «Жұмыспен қамтудың жол картасы» бағдарламасы аясында Жошы хан кесенесін реставрациялауға және тарихиа-мәдени орталықтың инфрақұрылымын құруға республикалық бюджеттен 800 млн теңге бөлінген болатын. Жобада жұмыс істеп жатқан барлық жұмысшылар «Еңбек» бағдарламасы бойынша тартылған. Тарихи-мәдени кешенді осы жылдың тамыз айында пайдалануға беру жоспарланып отырғанын айта кетейік.
«Жұмыспен қамтудың жол картасы» бағдарламасы бойынша әлеуметтік жобалардың жүзеге асырылуымен танысқан Е.Тоғжанов Жезқазған тұрғындарының тұрғын үй және әлеуметтік-тұрмыстық мәселелерінің қалай шешіліп жатқанына ерекше назар аударды. 2020 жылға дейін жүргізілген техникалық зерттеуге сәйкес 26 көппәтерлі тұрғын үй апаттық жағдайда деп танылған, оның 9-ы күрделі жөндеуді қажет етеді, 17-сі бұзылуы тиіс. Е.Тоғжанов әкімдік 17 апаттық үйдің тұрғындарын үш жылда басқа жерге көшіру бағдарламасын жасағанын айтты.
Өңірде өткір тұрған мәселенің бірі – халықты сумен қамтамасыз ету. Е.Тоғжанов Жезқазған мен Сәтбаев қалаларын сумен қамту мәселесін шешуі тиіс Есқұла су құбырының құрылысына көңіл бөлді.
– Суға байланысты өткен жылы үлкен мәселе болғанын білеміз. Жергілікті халық 11 күн сусыз отырды. Ондай мәселе болашақта қайталанбауы керек. Облыс әкімімен бұл туралы әңгімелестік, шешу жолы анықталды. Облыс басшылығы сумен жабдықтау мәселесін түбегейлі шешуге уәде беріп отыр, – деді Премьер-Министрдің орынбасары.
Бүгінгі таңда Сәтбаев қаласы ауыз сумен жаңа су жабдықтау жүйесі арқылы қамтамасыз етіліп отыр. 2019 жылы «Қазақмыс корпорациясы» ЖШС-нің бас жобалау институты Жезқазғанда Есқұла су таратқышын қайта қалпына келтіру жобасын жасады. Вице-премьер тұрғындардың әлеуметтік мәселесін шешу Үкіметтің бақылауында екенін баса айтты. Өз кезегінде Қарағанды облысының әкімі Жеңіс Қасымбек Кеңгір су қоймасынан қосымша сумен жабдықтау жүйесі екі айдың ішінде іске қосылатын хабарлады.
Үкіметтік делегация Жезқазғанда салынып жатқан 900 орындық Назарбаев зияткерлік мектебін аралап көрді. Нысандағы барлық жұмыс кестеге сәйкес жүргізілуде. Қазіргі уақытта құрылыс аяқталуға жақын. Халықаралық нормаларға сәйкес білім беру нысанының ауласын абаттандыру, ғимаратты жиһазбен толық жабдықтау бойынша тапсырмалар берілді.
