Көктемгі дала жұмыстарының барысы туралы облыстық ауыл шаруашылығы басқармасының басшысы Сағынжан Апақашов аппарат жиынында баяндады.
– Бүгінгі күні 730,4 мың гектар алқапқа дәнді дақылдар сіңірілді. Картоп 9630 га жерге отырғызылды. Көкөніс тұқымы 1221 га алқапқа егілді. Ірі ауыл шаруашылық тауар өндірушілері негізінен көктемгі дала жұмыстарын аяқтады, – деп мәлімдеді ол.
Сондай-ақ Сағынжан Апақашов биыл диқандар минералды тыңайтқыштар сатып алуды ұлғайтып, келісім-шарт бойынша жеткізу жұмыстары жүргізілу үстінде екенін хабарлады. Кәсіпорындарға субсидия төлеу басталған. Сұрыпты жаңарту үшін ауыл шаруашылығы өндірушілері 8 700 тоннадан астам жоғары өнімді дәнді дақылдардың, 4 300 тоннадан астам элиталық картоптың тұқымдарын сатып алды.
Биылғы жылдың көктемгі дала жұмыстарына 128 шаруашылық «ҚазАгро» компаниясы арқылы 4 млрд теңге мөлшерінде несие алды. Қаржыландыру «Кең дала», «Қарапайым заттар экономикасы» және басқа да бағдарламалар бойынша жүзеге асырылған.
Сонымен қатар Сағынжан Апақашов 2020 жылға арналып жалпы сомасы 2,8 млрд теңге болатын субсидия түріндегі мемлекеттік қолдау қарастырылғанын хабарлады.
