Қоғам • 26 Мамыр, 2020

ХҚО-ға бару тәртібі бекітілді

262 рет
көрсетілді
3 мин
оқу үшін

Қазақстанда ресми түрде төтенше жағдай тәртібі аяқталды. Бұған қарамастан, коронавирус инфекциясының таралуын болдырмау үшін көптеген аймақта карантин шаралары жалғасуда. «Азаматтарға арналған үкімет» корпорациясы халыққа қызмет көрсету орталықтарына халықтың иін тіресіп жиналуына жол бермеу үшін, яғни вирустың жұғу қаупін азайту мақсатында бірқатар нақты шара қабылдады.

ХҚО-ға бару тәртібі бекітілді

Жұртшылық ХҚО-да электронды форматта алу қарастырылмаған, «қағаз» жүзіндегі қызметтерді ғана ала алады. Бұл шамамен 100 мемлекеттік қызмет, оларды алу үшін мекемеге баруға тура келеді. Сондай-ақ egov.kz порталы арқылы онлайн түрде рәсім­дел­ген қызметтердің дайын нәти­жесін алуға болады. Орталыққа бару үшін ал­дын ала кезекті брондау міндетті.

Айта кету керек, өзгерістер тек Нұр-Сұлтан, Алматы және Шымкент қалалары мен облыс орталықтарында орналасқан ХҚО-ларға қатысты. Аудан орталықтарында және ауылды елді мекендерде орналасқан мекемелер бұрынғыдай жұмыс істей береді.

 Кезекке тапсырыс беру керек

Халыққа қызмет көрсету орталы­ғы­на барарда кезек уақытына тапсырыс беру үшін egov.kz электронды үкімет порталын, eGovKzBot 2.0 телеграм-ботын пайдалануға немесе 1414 нөміріне қоңырау шалуға болады. Бронь қызмет алушының ЖСН-ін тіркеу арқылы жасалады. Егер баратын уақытын алдын ала белгілемесе, кезекті сол жерде брондауға болады. Алайда қабылдау дәл сол уақытта болатынына кепілдік берілмейді.

egov.kz порталында қолжетімді барлық мемлекеттік қызметтің 80%-дан астамын қазақстандықтар үйінде отырып ала алады. Ол үшін электронды цифрлы қолтаңбасы болса болғаны. ЭЦҚ-ны да порталдан алу мүмкіндігі бар.

Кейбір қызметтерді ЭЦҚ-сыз, бір реттік құпиясөздің көмегімен де алуға мүмкіндік жасалған. Ол үшін мобильді азаматтар базасында тіркелу қажет. Қызметтерді онлайн алу бо­йынша сұрақ туындаса, 1414 номеріне немесе порталдағы виртуалды ассис­тентке хабарласқан жөн.

 Бейнеқоңырау бар

Азаматтарға арналған үкімет операторлары қазақстандықтарға egov.kz порталындағы бейне қоңырау арқылы тікелей кеңес бере алады. Ол үшін парақшаның оң жақ төменгі бұрышындағы «Виртуалды ассис­тент» батырмасын басып, ашылған терезеден бейнекамераның белгісін таңдайсыз. 

Сонымен қатар компьютері немесе интернетке шығу мүмкіндігі жоқ азаматтар үшін ХҚО ғимараттарынан бөлек, 328 өзіне өзі қызмет көрсету бұрышы ашылды. Олар аудандық әкім­дік­тердің ғимараттарында, оқу орындарында, медицина ұйым­дарында, сауда ойын-сауық орта­лықтарында және басқа да нысандарда орналасқан. Алдағы уақытта мұндай бұрыштар саны көбейеді. Үш санаттағы азаматтар – зейнеткерлер, көпбалалы отбасылар, мүмкіндігі шектеулі азаматтар электронды қыз­меттерді ХҚО-ның жеңілдік тере­зесі арқылы ала алады.

20 мамырдан бастап аймақтық штабтардың рұқсатымен 10 өңірдегі ХҚО мекемелері толығымен жұмыс істейді бастағанын айта кетейік. Бұлар: Нұр-Сұлтан қаласы мен Ақмола, Ақтөбе, Алматы, Қарағанды, Қостанай, Қызылорда, Түркістан, Сол­түстік Қазақстан және Павлодар облыс­тары. Ал Алматы, Шымкент, Атырау және Шығыс Қазақстан облыс­тарында ХҚО тек бизнес өкіл­де­ріне қызмет көрсетеді. Жамбыл облы­сын­дағы орталықтар жабық.