Қарағанды облысы: Бір аптадан кейін дәмханалар ашылады

Аймақтар • 27 Мамыр, 2020

Қарағанды облысында бір аптадан кейін дәмханалар ашылады

113 рет көрсетілді

Жергілікті Saryarqa телеарнасының тікелей эфирінде өткен брифингте Қарағанды облысының әкімі Жеңіс Қасымбек карантиндік шаралардың босаңсуына қарамастан, санитарлық талаптарды бұлжытпай орындау, қоғамдық орындарда бетперде киіп, әлеуметтік қашықтықты сақтау және санитайзерлерді пайдалану қажеттігін тағы бір мәрте еске салды.

Қайрат Әбілда

Сондай-ақ, ол карантиндік шектеудің коронавирус инфекциясының алдын алудың бірден-бір тиімді іс-шарасы екендігін атап өтті.

– Суық тию белгілері кезіндегі өзін-өзі оқшаулау және дәрігерді жедел шақыру, бетперде кию, кезекте, қоғамдық көлікте, серуендеу кезінде әлеуметтік қашықтықты сақтау – бұл санитарлық дәрігердің талабы ғана емес, бұл өркениетті қоғамның барлық мүшелері орындауы тиіс қазіргі заманғы этикеттің жаңа ережелері, – деді ол.

Брифингте өңір басшысы Қарағанды облысында сауда орталықтары, дәмханалар мен мейрамханалардың 29 мамырдан бастап жұмыс істейтінін мәлімдеді. Дәл осы күні 30 адамға дейінгі сыйымдылығы бар жазғы террасалар мен қонақ үйлер де келушілерге айқара есік ашады. Сауда-ойын-сауық орталықтары да ашылғанымен, оларда орналасқан балалар алаңдары мен кинотеатрлар әзірге жабық болады. Бала бақшалардағы кезекші топтар маусымның 1-жұлдызында жұмысын бастайды.

Сонымен қатар, Жеңіс Қасымбек КВИ аурушаңдығының өсуі төмендеп, эпидемиологиялық жағдай тұрақтанар болса, маусым айынының басында Теміртау қаласы мен Ботақара кентін ашудың жоспарда бар екенін де хабарлады.

Дегенмен, ол КВИ аурушаңдығының өсуі төмендеген жағдайда ғана карантиндік шараларды одан әрі жеңілдетуге болатынын мәлімдеді.

Қарағанды облысы