Карантиндік шектеулердің салдарынан туындаған кедергілерге қарамастан, бүгінде ауданда бұл жұмыстар жедел түрде басталып та кетті. Мысалы, қазір аудан орталығы Ақсу-Аюлы кентіндегі екі қабатты көппәтерлі тұрғын үйдің шатырын жаңалау және сыртын қаптау жұмыстары қызу жүргізілуде. Аталған нысанға аудандық жұмыспен қамту орталығы арқылы жергілікті тұрғындар да жұмысқа тартылған.
Сондай-ақ аудандағы ірі елді мекен – Ақадыр кентінде бірнеше көше бойымен жаяу жүргіншілер жолы салына бастады. С.Сейфуллин кентіндегі басты көшелердің жолына асфальт төсеу жұмыстары да қарқынды жүргізіліп жатыр.
Таяуда Шет ауданының халықты жұмыспен қамту орталығы «Мобильді жылжымалы жұмысқа орналастыру рекуртті пункті» тобын ұйымдастырған болатын. Бүгінде аталған жоба қызметкерлері аудан бойынша елді мекендерді аралап, тұрғындарға «Жұмыспен қамту 2020 жол картасы» бағдарламасы аясында берілетін мүмкіндіктер жайлы анықтамалар беру ісімен айналыса бастады. Жүргізілген жұмыстар нәтижесінде, аталған бағдарлама бойынша ауданның жұмыссыз жүрген 20 тұрғыны тіркеуге алынды. Олардың ішінде Ақадыр кентінің жеті, Ортау ауылының жеті және Көктіңкөлі елді мекенінің жеті тұрғыны жұмысқа орналастырылды. Мобильді топ жақын аралықта ауданға қарасты барлық елді мекендерге іссапармен шығуды жоспарлап отыр.
Сонымен қатар, Шет ауданында «Ауыл – Ел бесігі» арнайы жобасы аясында 2020 жылға арналып сегіз жобаға жалпы сомасы 686 млн 331 мың теңгені құрайтын қаржы бөлінді. Бұдан бөлек, әлеуметтік сала бойынша төрт жобаға 279,5 млн теңге қаржы қарастырылған.
Осы жоба бойынша Ақсу-Аюлы ауылындағы көп жылдардан бері күтім болмаған орталық аурухананы күрделі жөндеуден өткізуге жалпы соммасы 525,0 млн теңге қаржы бөлініп, оның тендерін мемлекеттік сатып алу конкурсы бойынша 473,0 млн теңгеге «Аспап» өндірістік кооперативі жеңіп алды. Үнемделген қаржының өзі 52,0 млн теңгені құрады. Бүгінде жоғарыдағы қаржының биылға деп жоспарланған 200,0 млн теңгесі қолға тиіп, сәуір айынан бастап кестеге сәйкес жұмыстар жүргізілуде. Айта кететін бір жайт, құрылыс жұмыстарына жергілікті жердің азаматтары да молынан тартылған.
– Шет аудандық орталық ауруханасына күрделі жөндеу жұмыстарын жүргізуді биылғы сәуір айынан бастадық. Жұмысқа 94 адам мен 5 техника күші жұмылдырылды. Олардың арасында жергілікті тұрғындар да бар. Бүгінгі күні жұмыс қарқынды жүргізілуде, – дейді «Аспап» фирмасының учаске бастығы Төлеухан Акеев.
Жалпы, аталған фирманың жұмысты уақытында және сапалы етіп бітіреріне деген сенім мол. Себебі, «Аспап» ӨК еліміздегі құпылыс нарығында 30 жылдан бері жұмыс істеп келе жатқан беделді және сенімді компаниялардың бірі.
Сондай-ақ аудан орталығындағы Ы.Алтынсарин, Ж.Ақылбаев атындағы мектептердің және Ақсу-Аюлы ауылындағы балалар мен жасөспірімдер мектеп ғимараттарының қасбеттерін күрделі жөндеуден өткізіледі. Бұл жұмыстарға қажетті қаржы жеткілікті мөлшерде бөлінген.
Ауданнан жырақта жатқан ауылдардың қат-қабат мәселелері де назардан тыс қалмаған. Мысалы, биыл Босаға, Киікті ауылдарында су желілері ағымдағы жөндеуден өткізіледі. Сондай-ақ, қазақтың классик композиторы Сыдық Мұхамеджановтың туған ауылы Киіктіде орта мектептің құрылысы басталмақшы. Аудандағы Батық, Көктіңкөлі, Бұрма ауылдарындағы үйлердің шатыры, Ақжал елді мекеніндегі балалардың ойын алаңы жөндеуден өткізіледі. Ал Ортау, Ақшатау, Дәрия, Төменгі Қайрақты елді мекендеріндегі жолдарды қалыпқа келтіру жоспарда бар.
Шет ауданының әкімі Мұхит Мұхтаров бұл жұмыстармен қатар елді мекендердегі санитарлық тазалық пен абаттандыру және жарықтандыру жұмыстарына да баса назар аударылатынын айтады. «Биылғы жылы «Еңбек» нәтижелі жұмыспен қамту және жаппай кәсіпкерлікті дамыту» бағдарламасының «Жол картасы-2020» бағыты аясында аудандағы барлық ауылдық елді мекендерде тұрғындар игілігіне бағытталған бірқатар ауқымды жұмыстар жүргізіледі. Жалпы, осы бағыттағы атқарылатын шаруалардың сапалы орындалуын жіті назарда ұстайтын боламыз», деп сендірді аудан әкімі.
