«Қазпочта» өкілі шетелден сәлемдемелер алуға шектеулер жоқ екенін айтты

Қоғам • 28 Мамыр, 2020

«Қазпочта» өкілі шетелден сәлемдемелер алуға шектеулер жоқ екенін айтты

49 рет көрсетілді

Соңғы айларда пандемияға қатысты ел ішінде және шет елдерден жеткізілетін сәлемдемелердің кешігетіні туралы пікір көбейіп кеткен болатын. Бүгін «Қазпочта» АҚ басшысы Сәкен Сәрсенов Нұр-Сұлтанда өткен онлайн конференцияда осы және басқа сұрақтарға жауап беруге тырысты.

Гүлбаршын АЙТЖАНБАЙҚЫЗЫ

- «Қазпочта» АҚ-дан сәлемдемелер алуға ешқандай шектеулер жоқ, әуе және теміржол тасымалдарының болмауына байланысты жекелеген елдермен пошта байланысы қол жетімді емес. «Қазпочта» АҚ-ға сәлемдемелерді жеткізу мерзімі автомобиль жолымен жүзеге асырылғандықтан артты, деді «Қазпочта» АҚ Басқарма төрағасы Сәкен Сәрсенов.

С. Сәрсеновтың түсіндіруі бойынша ел ішіндегі сәлемдемелердің жеткізілетін мерзімі 2-3 күн, сонымен қатар, ол «Қазпошта» тарапынан шетелден сәлемдемелер алуға ешқандай шектеулер жоқ екенін де атап өтті.

«Біз пакеттерді кез-келген жерден қорқынышсыз ала береміз, дегенмен халықаралық тәртіпте белгіленген шеңберде сақтық шаралары қолданылады, пакет арқылы вирус жұқтырған жағдайлар болған жоқ. Бірақ бірқатар елдермен әуе және теміржол байланысының тоқтатылуына байланысты аталған елдерге сәлемдемелер қабылдау тоқтатылды», - деді ол.

Пандемия электрондық сауданың бәсін арттырып жіберді. Біздің елде оның базалық жүйесі жақсы дамыған: 200-ден астам интернет-дүкені, 70-тен астам логистикалық компания жұмыс жасайды, түрлі төлем құралдары да бар.

Сондай-ақ Қазақстаннан және басқа да алыс-жақын шет елдерден сәлемдемелерді қабылдауды тоқтатқан елдердің тізімі «Қазпочтаның» веб-сайтқа орналастырылған.

Оның айтуынша, барлық дерлік елдер шекараларын ашып, сәлемдемелерді қабылдап жатыр. Тіпті ғаламтор арқылы да тапсырыс беріп, алдырудың да мүмкіндігі бар. «Қазпошта» басшысы шетелден келген сәлемдемелер өңделмейтінін тілге тиек етіп өтті. Себебі олар бірнеше күн бойы жолда жүреді. Ал вирус тек тірі ағзамен байланысқанда ғана тіршілігін жалғастырады. Бірақ соған қарамастан Қазақстаннан Қытайға жеткен сәлемдемелер қайта өңделіп, дезифекциядан өткізілетін көрінеді. Қазір Қазақстанға жеткізілетін сәлемдемелердің 60 пайызы Қытайдан келеді екен. Тіпті Қытайда шет елден келген вагондардың өзіне дезифекция жасалады.

Күннің маңызды және өзекті жаңалықтарын «Егемен Қазақстан» телеграм каналынан оқыңыз