Аймақтар • 30 Мамыр, 2020

Атырауда өзен порты жұмысын қайтадан бастады

335 рет көрсетілді

Бұдан бес жыл бұрын Атырау өзен портының жұмысы тоқтаған болатын. Оның басты себебі – Жайық-Каспий каналының түбін  тереңдету жұмысының  жүргізілмеуі.

– Бұл порт бұрынғы Гурьев қаласында 1926 жылы ашылған еді. Содан бері бір ғасырға жуық мерзімде кемелермен жүк тасымалданып келді. Ал, 2010 жылы портқа реконструкция жүргізіліп,  жыл сайынғы жүк қабылдау қуатын 15 мың тоннаға жеткізген едік. Алайда, бес жыл бұрын жұмысымызды тоқтатуға мәжбүр болдық. Өйткені, Жайық-Каспий каналымен жүк тасымалдау мүмкін болмады. Канал жолы бітеліп,  тереңдету жұмыстарын жүргізу қажеттігі туындады, -дейді Атырау өзен портының директоры Азамат Зұлхарнаев.

Оның айтуынша, портқа су жолымен соңғы рет 2015 жылы жүк келіпті. Сол кезде  шетелдік мұнай және сервистік компаниялардың  тапсырысымен жеткізілген жүк қабылданған еді. Содан кейін  Атырауға су жолымен келетін жүктер Маңғыстаудағы Баутин портына жеткізілетін болды.

Енді міне, Атырау өзен портына бес жылдан кейін  ірі габаритті жүкті  қабылдай бастады.  Бұл –газ-химия кешені үшін Оңтүстік Кореяда құрастырылған пропан сақтайтын резервуарлар.

–Біз газ-химия кешенінің құрылысына қажетті резервуарларды қабылдап алдық. Оның салмағы –532 тонна. Ірі габаритті жүкті екі баржамен жеткізді. Жақында тағы осындай үш баржамен келетін  ауыр жүкті күтіп отырмыз, -дейді өзен портының қызметкері Руслан Асанов.

Өзен портының директоры Азамат Зұлхарнаевтың айтуынша, енді мұнда алыс және жақын шетелдерден тауардың кез келген түрі тиелген су көліктерін қабылдауға толық мүмкіндік бар. 

Соңғы жаңалықтар

Ұқсас жаңалықтар