Шалғай ауылда интернетсіз Wi-Fi желісі бар

Технология • 01 Маусым, 2020

Шалғай ауылда интернетсіз Wi-Fi желісі бар

19 рет көрсетілді

Оқу жүйесі онлайн режімге көшірілген кезеңде әр шаңыраққа ғаламтор желісі тұрмақ, ұялы телефон байланысы жетіп үлгермеген шалғайдағы елді мекендер үшін алаңдаған едік. Алайда «қалауын тапсаң қар жанар» демекші, ебін тауып, шәкіртті білімсіз, ұстазды жұмыссыз қалдырмай келе жатқан мектеп басшылары да бар екен.

Egemen Qazaqstan

Карантин кезінде қашықтан оқыту жұмыстарын ойдағыдай ұйымдастырып отырған білім ошағының бірі Қарағанды облысы, Жаңаарқа ауданындағы Ақтау ауылында орналасқан, Ақтау жалпы орта білім беретін мектебі. Шалғайы шалғай-ақ. Облыс орталығынан шығып, осы Ақтауға жетемін дегеніңізше 300 шақырымнан астам жол жүрер едіңіз. Онысымен қоймай, әлем жұртшылығы 5G интернетті игеріп үлгерген ХХІ ғасырда бұл ауылдың тұрғындары қарапайым ұялы телефон байланысына зәру. Хош. Айтпағымыз бұл емес еді.

– Ауылдағы бірде-бір үйге интернет желісі тартылмаған. Алайда интернет мүлдем жоқ деуден аулақпын. Спутник арқылы ауыл әкімдігі, мектеп және дәрігерлік амбулатория сынды нысандар ғана қамтылып отыр. Сол себепті де қашықтан оқыту жұмыстарын ұйымдастыру кезінде бірқатар қиындықтар туындады. Білім және ғылым министрлігі біз секілді шалғайда жатқан ауыл тұрғындарына «Balapan», «EL ARNA» телеарналары мен Қазақ радиолары арқылы баламалы оқыту жүйелерін ұсынғаны белгілі. Қазіргі таңда біз «Balapan» арнасының мүмкіндігін кеңінен қолданып отырмыз, – дейді мектеп директоры Мақсат Арунов.

Оның айтуынша, мектеп әкімшілігі мұнымен шектелген жоқ. Кеңесе келе, ауыл тұрғындарына интернетсіз корпоративтік Wi-Fi желісін тарту туралы шешім қабылдады. Бұл Wi-Fi желісінің артықшылығы сол, бұған интернетке төлегендей ешқандай трафиктік төлем алынбайды. Яғни ата-аналар үшін тегін. Осылайша желілік жүйе ойластырылып, іске қосылды. Оқушысы бар шаңырақтарға 54 мектеп компьютері уақытша берілді. Соның ішінде компьютері жоқ 27 көпбалалы отбасы да бар. 1 компьютер ғана мектеп ғимаратында қалдырылып, қалған 54-і жоғарыда атап өткен желі арқылы бір-бірімен байланыс жасап тұр.

Корпоративтік Wi-Fi желісі дегеніміз не? Бұл желі баяғыдан бар. Алайда осы уақытқа дейін бұл локальді желі үлкен ғимараттарда ғана қолданылған еді. Ал мектеп әкімшілігі жаңалық ретінде оны аумағы 1,5 шақырымды құрайтын ауылға, онда орналасқан үйлерге тартып отыр. Осылайша оқушылардың онлайн түрде оқудан қол үзіп қалмауына күш салынды. Олар үйден шықпай-ақ желі арқылы сабақ тапсырмаларын алып, білімін жетілдіруде.

Гүлшахар КӨБЕЕВА,

Жаңаарқа аудандық білім бөлімінің әдіскері

Қарағанды облысы