Ресей мен Беларусь сияқты Одақтас мемлекеттің құрамына қосылу жоспарымызда жоқ

Президент • 03 Маусым, 2020

Ресей мен Беларусь сияқты Одақтас мемлекеттің құрамына қосылу жоспарымызда жоқ - Президент

258 рет көрсетілді

Мемлекет басшысы Қасым-Жомарт Тоқаев ресейлік «Комсомольская правда» басылымына берген сұхбатында Ресеймен және Беларусьпен арадағы ынтымақтастық жайында сөз етті.

Egemen Qazaqstan

«Қазақстан Ресеймен және Беларусьпен екіжақты форматта да, ЕАЭО, ҰҚШҰ, ТМД сынды интеграциялық бірлестіктер аясында да тығыз жұмыс жүргізіп келеді. Ресей мен Беларусь сияқты Одақтас мемлекеттің құрамына қосылу біздің жоспарымызда жоқ. Жоғарыда аталған ұйымдар аясында интеграцияны одан әрі дамыту басым бағытымыз болып қала береді. Еуразиялық Экономикалық Одақтың әлеуетін тек экономикалық одақ ретінде күшейтуге мүдделіміз. Кооперациялық байланыстарды дамыту, тауарлардың, көрсетілетін қызметтердің және жұмыс күшінің ортақ нарығын құру, аталған одаққа мүше мемлекеттердің инвестициялық тартымдылығын арттыру арқылы ЕАЭО-ны жаһандық ауқымдағы тиімді құрылымға айналдыра алар едік», - деді Қасым-Жомарт Тоқаев сұхбатында.

Оның айтуынша, бұл бағыттағы жұмыстар жүйелі түрде ілгерілеп жатыр. 2025 жылға қарай ортақ энергетикалық және қаржылық нарық қалыптасады. Әсіресе, цифрлық ықпалдастық перспективалы бағыт болмақ.

«Кейде ЕАЭО-да, тіпті ең жоғары деңгейде, қызу пікірталастар болады, бірақ бұл талқылаулар одақты неғұрлым табысты, беделді, тартымды етуге деген ортақ талпынысты білдіреді. Ал оған немқұрайлы қарау – анық деградацияның белгісі», - делінген Президент сұхбатында.

Күннің маңызды және өзекті жаңалықтарын «Егемен Қазақстан» телеграм каналынан оқыңыз