Коронавирус • 04 Маусым, 2020

COVID-19: Енді симптомсыз науқастар үй карантинінде болады

172 рет көрсетілді

Осы аптадан  бастап вирус анықталғанымен ауру белгілері болмаған науқастар үй карантинінде болады. Бұл туралы Орталық коммуникациялар қызметінде «Коронавирус пандемиясына қарсы шаралар» тақырыбында өткен онлайн брифингте Денсаулық сақтау министрі Елжан Біртанов  айтты.

Ең алдымен Е.Біртанов коронавирус инфекциясы бойынша ағымдағы жағдайға тоқталды. «Бүгінгі күні елімізде коронавиурс инфекциясын 12124 адам жұқтырды. Оларың 77%-ы – симптомсыз науқастар. Соған қарамастан барлық тіркелген азаматтарға толық медициналық диагностикалық көмек мемлекет тарапынан тегін беріледі. Ем халықаралық әріптестермен ақылдасқан ғылыми жұмыстарға негізделген клиникалық протокол арқылы жүргізіледі. Бұл протоколды еліміздің ең белгілі ғалымдары әзірлеп, бекіткен. Эпидемия басталғаннан бері 8 редакциядан өтті. Сол ем-домның нәтижесінде 52% (6288) науқас жазылып шықты. Ал 5836 пациент бақылауда», деді ол.

Еліміздің бас дәрігері жақында ғылыми зерттеу жұмыстарының негізінде елімізде коронавирусқа қарсы шаралардың тактикасы өзгергенін жеткізді. «Жаңа тактика халықаралық стандарттарға да сай келеді. Ол – симптомсыз науқастарды ауруханаларға жатқызбай, үй карантиніне алу.  Олар жергілікті емханалардағы учаскелік дәрігерлердің бақылауында болады. Қазіргі уақытқа дейін сондай жеңіл деңгейдегі науқастар инфекциялық ауруханаларда жатыр. Осы аптадан бастап осы протоколды енгіздік. Қазір стационарда жатқан 5836 науқастың 59-ының (1%) хәлі нашар. 600-дей (10%) пациенттің жағдайы орташа деңгейде. Тағы 10%-ының ауруы жеңіл болса, 78%-ы (4500 адам) –  симптомсыз», деді Е.Біртанов.  

Кейбір осындай ауру белгілері еш байқалмаған науқастардың ауруханаға жатудан бас тартып жатқанын айтқан министр: «Мұны дұрыс түсіну керек. Ол инфекцияны басқаларға жұқтыруы мүмкін. Сондықтан олардың ауруханада немесе үйде өз-өзін оқшаулауы өте маңызды», деді.

Соңғы жаңалықтар

Ұқсас жаңалықтар