inform.kz
Күні кеше Президент Қ.Тоқаев туиттердегі жеке парақшасында:
– Үкіметтік комиссияның барлық іс-әрекетіне қарамастан, індетке шалдыққан азаматтарымыз азаймай отыр. Коронавирустың екінші толқынының қаупі сейілмегенін ДДҰ да растады. Отандастарымызды жаппай ауруға шалдығудан қашып, індеттен қорғанудың жолдарын (ара қашықтықты сақтау, дезинфекция, жеке тазалық, бетперде кию) ұстануға тағы да шақырамын, – деп жазды.
Шындығында, қауіпті індеттің беті қайтты деп еркінсуге әлі ерте. Денсаулық сақтау министрі Елжан Біртанов айтқан деректерге үңілсек, керісінше дабыл қағу қажет сыңайлы. Соңғы дерек бойынша елімізде вирус жұқтырғандардың саны 12 124-тен асты. Әйтеуір, науқастардың басым бөлігі, атап айтқанда 77 пайызы ауруды жеңіл өткізуде. 52 пайызы емделіп шыққаны да – көңілге медеу. Ал аурухана төсегінде жатқан 5 836 адамның 59-ының жағдайы ауыр. Олай болса, сақтықты ұмытқанымызға жол болсын!
Көктемді қатаң карантин құшағында өткізген еліміз екі айдан астам уақытқа созылған төтенше жағдайға тәртіппен төтеп берді. Төтенше жағдай тоқтаса да, карантин жалғасатыны туралы ескерту аз айтылған жоқ. Алайда күн сайын жүздеген адамның вирус жұқтырып жатқанын ескерсек, қауіпсіздік талаптарын құлаққа ілмей жүрген тәріздіміз. Масканы иекке іле салып, көшеде еркін серуендеп жүру қалыпты құбылысқа айналды. Әйтеуір, еркінсудің соңы сан соқтырмағай.
