Кеше еліміздің Қорғаныс министрлігінде Мәжілістің Халықаралық істер, қорғаныс және қауіпсіздік комитеті мен «Нұр Отан» ХДП партиялық жетекшісі сараптау тобының «Қорғаныс қабілеті және қауіпсіздік» бағыты бойынша көшпелі отырысы болып өтті.
Халықаралық істер, қорғаныс және қауіпсіздік комитетінің төрағасы Мәулен Әшімбаев бастаған депутаттар қатысқан жиын барысында әскери білім мен әскери ғылымды дамытудың келешегі кеңінен сөз болды.
Кеше еліміздің Қорғаныс министрлігінде Мәжілістің Халықаралық істер, қорғаныс және қауіпсіздік комитеті мен «Нұр Отан» ХДП партиялық жетекшісі сараптау тобының «Қорғаныс қабілеті және қауіпсіздік» бағыты бойынша көшпелі отырысы болып өтті.
Халықаралық істер, қорғаныс және қауіпсіздік комитетінің төрағасы Мәулен Әшімбаев бастаған депутаттар қатысқан жиын барысында әскери білім мен әскери ғылымды дамытудың келешегі кеңінен сөз болды. Атап айтқанда, офицер мамандарды дайындау жүйесін жетілдіру және Қазақстанның әскери оқу орындарының бірыңғай ақпараттық-білім желісін дамыту мәселелері талқыға салынды.
Мәжіліс депутаты Қуаныш Сұлтановтың сөзіне қарағанда, бұл комитеттің жұмыс жоспарына сәйкес өткізілген кезекті жұмысшы отырысы. Заман үрдісі мен талап-тілегіне қарай жаңа технологиялардың қалыптасуы заманында озық әдістерді қолдану және әскерилердің кәсіби дайындығы төңірегінде пікір алмасу – уақыт талабы.
Комитет төрағасы көшпелі отырысты өткізудің маңызына арнаған сөзінде оны әлемдегі өзгерістермен байланыстырды. Әскери қауіпсіздік саласында да айтарлықтай өзгерістер орын алуда. Жаңа әскери техникалардың енгізілуімен қатар, қашықтан басқару әрекеттері де кеңінен қолданыла бастаған. Әскери қауіпсіздікті қамтамасыз ету саласындағы интеллектуалды фактордың рөлі арттырылуда. Сондықтан да жаңа дәуірдің әскери офицерлері мен кадрларын даярлау маңызы артып отыр. Олай болса, әскери мамандар өте білімді болуымен қатар, өз Отанын сүйе білуі де шарт.
Сондай-ақ, комитет төрағасы әскери ғылымды дамыту саласында әскери тапсырыстарды ұлғайту уақыт талабы дегенге ерекше тоқталды. Материалдық-техникалық базаны нығайту мәселесі де назардан тыс қалған жоқ. Ал Мәжіліс депутаты Абай Тасболатов сөз реті келгенде патриоттық тәрбие беруді батыр бабаларымыздың ерлік жолдарын зерттеу мен зерделеу арқылы жүзеге асыруға болатынымен бөлісті. Депутаттың пайымынша, әскери патриоттық сезім алғашқы әскери дайындықтан, яғни мектеп қабырғасынан басталады. Осы ретте генерал алғашқы әскери дайындыққа бөлінген 140 сағатты 68-ге қысқартудың орынсыз екендігін айтып, өз қынжылысын білдірді.
Бұдан кейін сөз алған Мәжіліс депутаты Бақытжан Ертаев курсанттардың 95 пайызы қазақ тілін білгенімен, оларға берілетін білім ресми тілде жеткізілетінін ортаға салды. Ол осы сөзді айта отырып, әскери ұстаздардың қазірден білімді мемлекеттік тілде беруі қажеттігіне ерекше екпін түсірді. Оқыту-материалдық база уақыт талабына сай болуы керектігін ескерткен генерал оның қазіргі заман сын-қатерлеріне жауап бере алатындай деңгейде болуы қажеттігін де қаперге салды. Олай болса, Қазақстан өзінің әскери өндірісін арттырып, әскери ғылымын дамытуы қажет. Ол үшін әскерилер ішкі жаттығулармен қатар, халықаралық жаттығуларға да қатысып, оны ғылыми зерттеулермен ұштай түсулері тиіс.
Көшпелі отырыс барысында тақырыпқа сай қорғаныс қабілеті және қауіпсіздік мәселелері жан-жақты талқыланып, әскери білім мен ғылымды дамыту жайы кеңінен сөз болды. Көптеген ұсыныстар ортаға салынды.
Асқар ТҰРАПБАЙҰЛЫ,
«Егемен Қазақстан».
