Сонымен қатар бұл сұхбатта еліміздің ішкі және сыртқы экономикалық-саяси жағдайы жан-жақты айтылды. Тәуелсіз мемлекет ретінде әр елдің өзіндік даму жолы болады. Бірақ оған кейбір сыртқы күштердің қандай да бір кері ықпалы болуы мүмкін. Сұхбаттың маңыздылығы да сонда. Біз біртұтас тәуелсіз мемлекетпіз.
Бұдан бөлек, Президент Еуразиялық экономикалық одақтың әлеуетін экономикалық одақ ретінде күшейтуге мүдделі екенін атап өтті. Бұл ұйым Қазақстанның экономикалық тұрғыдан дамуына мүмкіндік беруі тиіс. Осы ретте, аталған ұйымның органы болып табылатын Еуразиялық экономикалық комиссия бар. Онда Одақ қабылдайтын жобалар қаралады. Бұл комиссияда біздің тараптың мүддесін қорғайтын азаматтардың жауапкершілігі, отанға деген сүйіспеншілігі, ел экономикасына деген көзқарасы дұрыс болуға тиіс.
Жалпы, Одақ аясында экономикалық әріптестіктің орнауы қалыпты құбылыс. Ендеше, Қазақстандағы шағын және орта кәсіпкерліктің үлесін арттырып, көрші елдермен бәсекелес бола алатындай деңгейге жеткізуіміз керек. Бұл үшін елімізде барлық мүмкіндік қарастырылған. Осы ретте, сырттан қарыз алуды әдетке айналдырмай, өз ішкі қаржылық әлеуетімізді тиімді пайдалануға тиіспіз.
Нұртай САБИЛЬЯНОВ,
Парламент Мәжілісінің депутаты