Қазақстан халқының біртұтастығын ел басына күн туғанда азаматтардың бірлесіп, бір-біріне қолдауға дайын тұратынынан-ақ байқауға болады. Азаматтарымыз қиын сәтте бір-біріне көмек қолын созуға әрдайым әзір. Мәселен, жақында Түркістан облысы Мақтаарал ауданындағы елді мекендерді су басуына байланысты аймақта жедел штаб құрылып, іле-шала отбасылар эвакуацияланып, азық-түлік таратылғаны белгілі. Осындай қиын-қыстау сәтте мемлекет тарапынан ғана емес, халық тарапынан қолға алынған шараларды ерекше айтқым келеді. Халқымыз Мақтааралдағы жағдайда да бірлесіп, басқа түскен тауқыметті бірге көтерді. Бұл іске Қазақстан халқы Ассамблеясының да үлес қосып, басы-қасында жүргені қуантарлық жайт. Этномәдени орталықтардың бастамасымен 180-нен астам жүк машинасы гуманитарлық көмек жеткізді. Қайырымдылық – Ассамблеяның басты назарда ұстайтын бағыттарының бірі. Сондықтан іргелі ұйым мұқтаж жандар мен жапа шеккендерге көмек қолын созуға қашанда дайын.
Этномәдени бірлестік волонтерлері Қордай ауданына 10 тоннадан астам гуманитарлық көмек жеткізуге атсалысты. Ал Арыстағы қойма жарылысы кезінде 51 млн 331 мың теңге көлемінде қаржы жинап, арыстық ағайынға табыстады.
Ассамблеялықтар «Біз біргеміз» акциясына да өз үлесін қосты. Пандемияға байланысты төтенше жағдай кезінде Ассамблея мүшелері көп балалы отбасыларға тұрақты түрде көмектесіп отырды. Халқымыз жәрдемді жылы жүрекпен, асқан ризашылықпен қабылдады. Біздің елде қиын жағдайға тап болған кез келген азамат қай ұлт өкілінен болсын қолдау табатыны анық. Бұл Қазақстанда біртұтас халық өмір сүретінін көрсетеді.
Қазақстанды Отаным деп санайтын өзге ұлт өкілдері бұл топырақтың негізгі халқынан мейірбандық, ақжүректік сияқты асыл қасиеттерді үйренді. Дәл осы аталған қасиеттер оларды өткен ғасырдағы қиын-қыстау заманнан аман алып қалған еді. Осылайша қазақ топырағына табан тіреген жұрт бүгінде тәуелсіз елдің біртұтас халқына айналды.
Қазақстандықтар өздерінің бойында жақсы қасиеттерді сақтай алды. Сол еңбегінің жемісін бүгін көріп отыр. Қазір түрлі этнос өкілдері өздерін диаспора ретінде қарастырмайды және өздеріне қатысты ондай көзқарасты сезінбейді де. Қазақстанда тұратын кез келген азамат өзін біртұтас ұлттың бөлігі ретінде көреді.
Бізді әлемнің қай жеріне барсақ та қазақстандық, қазақ болып қарсы алады. Біз осы топырақта дүниеге келдік, осы жерде өсіп-өніп, ұрпағымызды тәрбиелеп жатырмыз. Құдай қаласа, алдағы уақытта да біртұтас халық ретінде елімізді көркейте беретін боламыз.
Шерзод ПУЛАТОВ,
Қазақстан халқы Ассамблеясы Төрағасының орынбасары
