Кеше Президент жанындағы Мемлекеттік басқару академиясында Астана және Алматы қалалары мен облыстық әкімдіктер аппараттарының басшылары үшін «А» корпусының әкімшілік мемлекеттік қызметшілерінің біліктілігін арттыру семинары басталды.
Семинар үш күнге созылады.
Кеше Президент жанындағы Мемлекеттік басқару академиясында Астана және Алматы қалалары мен облыстық әкімдіктер аппараттарының басшылары үшін «А» корпусының әкімшілік мемлекеттік қызметшілерінің біліктілігін арттыру семинары басталды.
Семинар үш күнге созылады.Оның мақсаты тыңдаушылардың жобаларды басқару бойынша құзыреттерін дамыту, мемлекеттік органдардағы ішкі аудиттің негізгі аспектілерімен таныстыру, көшбасшылық дағдыларды жетілдіру, қақтығыстану саласындағы білімді кеңейту, сондай-ақ, әлеуметтік қақтығыстардың алдын алу мен шешуге атсалысу болып табылады.
Семинардың ашылу рәсімінде Президент Әкімшілігі Басшысының орынбасары Ғабидолла Әбдірахымов, Мемлекеттік қызмет істері агенттігінің төрағасы Әлихан Байменов, Президент жанындағы Мемлекеттік басқару академиясының ректоры Болатбек Әбдірасылов сөз алып, жиынның мақсаты мен мәнін түсіндірді. Семинардың бағдарламасы блок-модуль қағидаты бойынша құрастырылған екен. Оны әзірлеуге Еуропалық Одақтың сарапшылары қатысқан.
Семинардың бірінші күні «Policy Advisory Group» сарапшылары интерактивті тренинг өткізді. Онда жобаларды басқарудағы басты дағдылар нақты мысалдармен көрсетілді.
Ал бүгін, екінші күні әлемдегі жетекші мамандардың бірі - Шпайер Академиясынан доктор Джулия Флейшер (ГФР) мемлекеттік органдарда ішкі аудитті жүргізудің әдіснамасы мен еуропалық тәжірибесі туралы айтып береді. Біздің елімізде қазіргі уақытта осы проблема бойынша нормативтік құқықтық база әзірленіп жатқанын атап өту керек.
Қорытынды күні ENA-ның танымал сарапшысы (Франция Ұлттық мемлекеттік басқару мектебі) Пьер Жевар әлеуметтік шиеленістерді басқаруға басты назар аудара отырып, көшбасшылықты қалыптастыру бойынша тренинг өткізеді. Бұл шараның барысында әлеуметтік шиеленістердің алдын алу мен шешу шаралары қарастырылады деп күтіліп отыр.
Серік ПІРНАЗАР,
«Егемен Қазақстан».