Бұрнағы күні түнде Құрлықтық хоккей лигасының кезекті туры ойынын Мәскеуде жергілікті «Спартакпен» өткізген Астананың «Барысы» 4:3 (2:1, 0:0, 2:2) есебімен жеңіске жетті.
Бұрнағы күні түнде Құрлықтық хоккей лигасының кезекті туры ойынын Мәскеуде жергілікті «Спартакпен» өткізген Астананың «Барысы» 4:3 (2:1, 0:0, 2:2) есебімен жеңіске жетті.
Біздің жерлестеріміз «Сокольникиде» өткен матчтың 3-минутында есеп ашты. Оны Роман Старченкодан шайба алған Джош Грэттон салды. Мәскеуліктер Александр Никулиннің күш салуымен есепті 10-минутта теңестірді. Алайда, астаналықтар бұған көне қоймады. Олар үзіліске дейін форвард Константин Руденконың мергендігі арқылы тағы алға шықты.
Негізінен «Барыс» бірінші кезеңдегі осы бір шайбаның артықшылығы арқасында түпкі жеңіске жетті. Себебі, келесі екі кезеңде қарсыластар бір-бірінен аса алмады. Екінші кезеңде екі жақтың да есебіне гол жазылған жоқ. Ал үшінші кезеңде соққан шайбалары тең болды. Әуелі қазақстандық Михаил Рахманов есепті ұлғайтты (3:1). Сосын Майк Ландин «Барыс» сапындағы өзінің бірінші шайбасын түсірді (4:1). Кездесудің соңына қарай мәскеуліктер екі шайбаны қысқартуға қол жеткізді. Бұларды Вячеслав Козлов пен Ростислав Шпирко өз есептеріне жазды.
Осы жеңістен кейін «Барыс» өзінің тарихында бірінші рет ҚХЛ бойынша топ бастады. Онда қазір 11 ойыннан 27 ұпай бар. Санкт-Петербургтің СКА-сы да осынша ұпай жинады. Бірақ оның ішкі көрсеткіштері астаналықтардан төмен. Тағы бір айта кететін жайт, «Барыс» осымен қатарынан 86-шы матчты голмен аяқтап отыр.
«Барыс» келесі турдың ойынын 8 қазан күні өз алаңында Подольскінің «Витязь» командасымен өткізеді. Матч Астана уақытымен 19:00 сағатта басталады.
Дамир Қожамқұл.
