Шығыс Қазақстан облысы бойынша қаржы полициясы департаментінің қызметкерлері Өскеменде сот орындаушыларымен бірге сот шешімдерімен тәркіленген ойын автоматтарын жойды.
Шығыс Қазақстан облысы бойынша қаржы полициясы департаментінің қызметкерлері Өскеменде сот орындаушыларымен бірге сот шешімдерімен тәркіленген ойын автоматтарын жойды.
Ел заңдарына сәйкес ойын мекемелері саласындағы кәсіпкерлік қызметті арнайы екі орында – Ақмола облысының Бурабай – Шортанды демалыс аймағы мен Қапшағай су қоймасының оң жағалауында жүзеге асыруға рұқсат етілген.
Алайда, жасырын ойын мекемелерінің қызметіне тыйым салынғанына қарамастан, бұл салада заң бұзушылық етек алып отыр. Соған байланысты департамент қызметкерлері арнайы бекітілген жерлерден тыс орналасқан казино және ойын автомат залдарын анықтау және заң бұзушылықтың жолын кесу бойынша жұмысты жалғастыруда.
Ағымдағы жылдың 8 айында заңсыз ойын бизнесін ұйымдастырумен күрес саласында 17 қылмыс ашылып, 4 онлайн – казиноның қызметі тоқтатылды. Сотқа 5 қылмыстық іс жолданды.
Заңсыз айналымнан 53 ойын автоматы, 29 жүйелік блок, 1 рулетка алынды. Сонымен қатар, электрондық лотерея деген атты жамылған ұйымдасқан заңсыз ойын бизнесінің жолы кесілді. Электрондық лотерея терминалдарының иелеріне қатысты 6 қылмыстық іс қозғалып, 66 ойын терминалы тәркіленді.
Оңдасын ЕЛУБАЙ,
«Егемен Қазақстан».
ӨСКЕМЕН.
