Пара алғаны туралы күдікті болған Алматы мемлекеттік сервис және технология колледжінің директоры Маран Тақабаев қылмыс үстінде қолға түсер сәтінде өзі отырған кабинеттің терезесінен сыртқа секіріп кетіп, жазым бола жаздады. Абырой болғанда, кабинет ғимараттың екінші қабатында орналасқан екен, одан жерге секіріп түскен азамат аман қалды.
Пара алғаны туралы күдікті болған Алматы мемлекеттік сервис және технология колледжінің директоры Маран Тақабаев қылмыс үстінде қолға түсер сәтінде өзі отырған кабинеттің терезесінен сыртқа секіріп кетіп, жазым бола жаздады. Абырой болғанда, кабинет ғимараттың екінші қабатында орналасқан екен, одан жерге секіріп түскен азамат аман қалды.
ҚазАқпараттың хабарлауынша, аталмыш оқу орнының басшысын ұстау операциясын қаржы полициясы жедел іздестіру шарасы аясында жүргізіпті. Құқық қорғау органы қызметкерлері оның пара алып жатқан жерінде келіп қалған екен. Сосын директор бұдан құтылудың жалғыз жолы терезеден секіріп кету деп есептесе керек.
Дереккөз анықтағандай, колледж директоры 2007 жылдан бері асхана бөлмесін жалдап отырған кәсіпкерден ай сайын 200 мың теңге ақша алып келген. Қазір парақор басшы ауруханада жатқан көрінеді. «Ол Қалқаманда емделіп жатыр. Алып бара жатқан жарақаты жоқ. Бірақ миы шайқалған», делінген хабарламада.
58 жастағы Тақабаев аталмыш колледжді 2005 жылдан бері басқарып келеді. Ол сондай-ақ, Қазақстан Парламенті Сенатының депутаттығына үміткер көрінеді.
Құрыш НҰРЫМБЕТ.