Роналду 17 жылдық карьерасында «Спортинг», «Манчестер Юнайтед», «Реал» және «Ювентус» клубтарында доп теуіп, 650 млн доллар көлемінде жалақы алған. Ал қалған табысына демеушілермен келісімшарт арқылы қол жеткізген. Ол бір ғана Nike компаниясының өзінен жылына 20 млн доллар алады. Роналду 2016 жылы аталған компаниямен өмірінің соңына дейін келісімшартқа отырғанын да айта кетейік. Сондай-ақ атақты футболшы Clear, Herbalife және Abbott секілді ұйымдармен де әріптестік орнатқан.
Forbes журналының рейтингі бойынша Роналду ең көп табыс тапқан адамдардың арасында модель Кайли Дженнер (590 млн доллар), рэпер және дизайнер Канье Уэст (170 млн доллар) және теннисші Роджер Федерерден (106,3 млн доллар) кейін төртінші орында тұр. Ол былтыр 105 млн доллар табыс тапқан.
Айта кетейік, 35 жастағы футболшы 1 млрд доллардан көп қаржы тапқан әлемдегі үшінші спортшы атанды. Бұған дейін бұл межені гольф шебері Тайгер Вудс және кәсіпқой боксшы кіші Флойд Мейвезер бағындырған еді.
