Invest Day: Стартаптар үшін тың мүмкіндік

Технология • 09 Маусым, 2020

Invest Day: Стартаптар үшін тың мүмкіндік

27 рет көрсетілді

Қазақстанда кезекті Invest Day шарасы өтеді. Бұл жолы дәстүрлі жиын онлайн режімде ұйымдастырылады. Басты мақсат – инвесторлар мен дарынды жас өнертапқыштарды тоғыстыру. Олар ерекше жобаларды жүзеге асыру мүмкіндігіне ие болады.

Думан АНАШ

Astana Hub бас директоры Джозеф Циглердің айтуынша, болашағынан зор үміт күттіретін жобаларды іздеген инвесторлар ұтымды бастамаларды жүзеге асыруға қыруар қаражат бөлуге дайын. Осындай Invest Day шарасынан соң талай отандық тырнақалды бастама нарыққа шыға бастады.

«Біз жобаларды бірнеше бағыт бойынша бағалаймыз. Өнімнің өзі, оның тиімділігі, қоғамға пайдасы, қандай мәселелерді шеше алатыны, нарықтағы сұранысы, жетілдіруге қатысты көрсеткіштері сыналады. Кейін команда тексеріледі. Жобаны құрастырушылардың кәсіби деңгейіне мән беріледі. Сондай-ақ бүгінге дейін саудаға шығарылса, сатылу көрсеткіші, тұтынушы саны, өнім өткізілетін нарығының географиясы, шет елдер аумағында тарату әлеуеті толықтай сараланады», дейді ол.

Өтінімдер үш апта бойы қабылданады. Басты талап – IT саласы бағытындағы технологиялық стартап болуы керек. Олардың арасынан 10 үздігі іріктеледі. Жобаны қорғауға 5 минут және тағы сонша уақыт қойылған сауалдарға жауап беруге беріледі.

«Қандай жобалар табысқа ие болады? Әрине ең алдымен онлайн оқу, жалпы білім және денсаулық сынды қоғамдық салаларға қатысты бастамалар қызықты. Сондай-ақ электронды сауда, виртуалды шынайылық бағытындағы стартаптар көбіне қаржылай қолдауға ие болып жатады. Былтырғы Invest Day шарасында бірқатар жобаларға 200 мың доллар шамасында инвестиция тартылды. Биыл да бұл межеден кем болмайды деп ойлаймыз», дейді Джозеф Циглер.

Astana Hub баспасөз қызметінің хабарлауынша алдағы маусым айының 30 күні үздік жоба авторлары қазақстандық бизнес-періштелер, инвесторлар және түрлі қор өкілдерімен жүздесетін болады.

«Біз Қазақстанның инновациялық экожүйесінің басты қатысушысымыз. Өйткені әр бағыттағы қатысушылармен тікелей тығыз қарым-қатынас жасаймыз. Стартап үшін инвестицияның маңызы айрықша. Жақсы бір бастамаларға қаржы құюға ниетті инвесторларға стартап тауып береміз. Жоба иелеріне өнер табысын жүзеге асыру үшін қаржы тартуға көмектесеміз. Бұл барлығы үшін тиімді шара», дейді Astana Hub-тың бас директоры.

Күннің маңызды және өзекті жаңалықтарын «Егемен Қазақстан» телеграм каналынан оқыңыз