Ұйымдастырушылардың мәліметі бойынша, 2020/2021 жылғы Чемпиондар лигасының іріктеу кезеңіне өзгеріс енген. Енді електік матчтар үйдегі және сырттағы кездесу болып бөлінбей, тек бір ойыннан өтеді. Чемпиондар лигасында бақ сынайтын елорданың «Астана» командасы Еурокубоктағы жорығын 2020 жылдың 18-19 тамыз күндері алғашқы іріктеу кезеңінен бастайды. Екінші іріктеу кезеңі 25-26 тамызға, үшінші кезең 15-16 қыркүйекке, ал плей-офф матчы 22-24 және 29-30 қыркүйекке жоспарланған.
Ал Еуропа лигасында доп тебетін «Қайрат» пен «Ордабасы» командалары турнирді 27 тамызда бірінші іріктеу кезең ойындарынан бастайды. Былтыр ел кубогында топ жарған «Қайсар» екінші кезеңнен бастайды. Матчтар 17 қыркүйекте өтеді. Сондай-ақ 24 қыркүйекке үшінші кезеңнің ойындары, 1 қазанға плей-офф матчтары жоспарланған.
