Дене қызуы көтеріліп, жиі мазасыздана бастағанан соң айтулы азамат өткен аптада Бағдаттағы ауруханалардың бірінде тест тапсырды. Сол кезде оның коронавируске шалдыққаны анықталды. 18 маусымда сырқаттың беті қайтқандай болып, Ахмет үйіне қайтты. Алайда бірнеше сағаттан кейін атақты футболшының денсаулығы күрт нашарлап, ол қайта ауруханға жеткізілді. Сол жерде Ахмет жан тәсілім етті.
1964 жылы Ирактың Самарра қаласында дүниеге келген Ахмед Ради өз еліндегі түрлі клубтарда және Катардың "Әл-Вакрасында" өнер көрсетті. Амплуасы – шабуылшы. 1983-97 жылдар аралғыныда Ирак ұлттық құрамасының намысын қорғады. Сол аралықта 73 рет жасыл алаңға шығып, 42 мәрте нысананы дәл көздеді.
1986 жылы Мексикада өткен әлем чемпионатында Ирак футболшылары бір ғана гол соққаны жанкүйерлердің жадында. Сол голдың авторы дәл осы Ради еді. Ол топтық турнирде Жан-Мари Пфафф қорғаған Бельгия құрамасының қақпасынан саңлау тапты. Сондай-ақ, Ахмед 1988 жылы Сеул Олимпиадасына қатысты. Сол жылы ол құрлықтың жыл ойыншысы атанды. ХХ ғасырдағы Азияның ең үздік футболшылары тізімінде Ахмед Ради тоғызыншы орынға табан тіреді.
