Қоғам • 25 Маусым, 2020

Қызметкерлер өз есебінен ПТР-тесттен өтуге міндетті емес - министр

217 рет
көрсетілді
1 мин
оқу үшін

Қызметкерлердің өз қаражаты есебінен медициналық тексеруден өту Еңбек заңнамасында қарастырылмаған. Бұл туралы министр Біржан Нұрымбетов халыққа есеп беру кездесуінде айтты, - деп хабарлайды Egemen.kz.

Қызметкерлер өз есебінен ПТР-тесттен өтуге міндетті емес - министр

"Коронавирус инфекциясына байланысты жағдай нашарлап кетті. Сондықтан, бірнеше ұсынысым бар. Кеңсе қызметкерлерін барынша үйден жұмыс істеуге ауыстыру керек. Еңбек кодексі бұған рұқсат берген және төтенше жағдай кезіндегі тәжірибені ескеріп, кеңседе отырып жұмыс істейтін адамдар 100% оқшауланғаны дұрыс. Ал, қашықтан жұмыс істеу мүмкін емес кәсіпорындар мен ұйымдар қауіпсіздік шараларын күшейтпесе болмайды. Қызметкерлердің дене қызуын үнемі бақылауда ұстап, олардың арасындағы арақашықтықты сақтауы керек, дезинфекцияны да ұмытпаған жөн", - дейді Нұрымбетов.

Сондай-ақ министр жұмыс беруші коронавирус инфекциясын анықтайтын ПТР-тест талап етуге құқылы ма деген сұраққа жауап берді.

"Жұмыс беруші тест нәтижесін талап етіп жатыр деп көп естимін. Бірақ, қазір тесттің бәрі ақылы. Сондықтан, мәселеге дұрыстап қарасақ, еңбек қатынастарын реттейтін заңнамаға сәйкес, жұмысшы өз қаражаты есебінен медициналық тексеруден өтуге міндетті емес. Өндіріске қажетті міндетті медициналық тексерулер бар, оны жұмыс беруші өз есебінен ұйымдастыруы керек. Еңбек кодексіне сәйкес, жұмысшыға төнетін тәуекелдердің алдын алу – жұмыс берушінің міндетінде", - деді Нұрымбетов.