Қауіпті індет ауылдық елді мекендерге де көшіп жатыр. Өңірлік жедел ақпарат штабы берген соңғы мәліметте COVID-19 жұқтырған 27 науқастың Қарабалық, Ұзынкөл және Қостанай аудандарының тұрғындары екені айтылған. Бұған дейін бейқамдыққа бой алдырып келген жұрт індетке қарсы жаппай жасалып жатқан амалдың аса маңызды екенін енді ғана түсіне бастағандай. Өйткені екінің бірінің жақын туысы, танысы, әріптесі «жаман тұмау» жұқтырыпты деген жаманат хабар желдей есіп тұр.
Аймақтағы күрделі ахуалға байланысты ауруханаларды жедел түрде жаңа медициналық құрылғылармен жабдықтау шаралары қолға алынып, бұл мақсатқа бюджетттен 2 млрд теңге қаржы бөлінді. Денсаулық сақтау басқармасы басшысының орынбасары Анжела Бексұлтанованың айтуынша, емдеу мекемелері үшін бүгінге дейін төсек алдына қойылатын 60 монитор, 40 жасанды демалдыру құрылғысы, 20 ларингоскоп, 20 дефибриллятор, 3 қандағы газ құрамына талдау жүргізетін аппарат, 170 термометр, 11 мың қорғаныш костюмі, 3,5 мың қорғаныш көзілдірігі, 800 дезинфекция құралы мен 10 мың бетперде сатып алу туралы келісімшарт жасалған. Бұл құрылғылардың біразын қазір қалалық және аудандық ауруханалар пайдаға асырып жатыр.
– Қазір коронавируске қарсы қосымша емдеу орындарын көбейтуді қолға алып жатырмыз. Бүгінде облыста індет жұқтырған науқастарға, олармен байланыста болғандарға және коронавируске ұқсас ауру белгісі бар адамдарға арналған 1488 төсек-орын бар. Инфекциялық стационарларда COVID-19 жұқтырған 474 орын бар еді. Кеше ғана 250 орындық жаңа емдеу мекемесін жабдықтадық. Мен облыс тұрғындарын сабыр сақтауға шақырамын. Қазір облыс дәрігерлері күшейтілген режімде жұмыс істеп жатыр. Бастысы, бас санитарлық дәрігердің нұсқауын орындау арқылы бізге көп көмек тигізетіндеріңізді түсініңіздер. Жасырын жиын өткізуді, қонаққа баруды, қонақ шақыруды қою керек. Үйден беталбаты шықпаңыздар. Жақындарыңызды, туыс-туғандарыңызды қорғаңыздар, – деді А.Бексұлтанова.
29 маусым күні түс ауа облыс орталығындағы қалалық аурухана суық тиген, тұмау жұқтырған және өкпесі қабынған адамдардан басқа науқастарды қабылдауын тоқтатып, 250 орындық провизорлық стационар қызметін атқара бастады. Денсаулық сақтау басқармасы арнайы бұйрық шығарып, басқа емханалардағы дәрігерлер мен медбикелерді осы жерге қосымша жұмылдырды. Қазір бұл ауруханадағы салалық дәрігерлердің бәрі провизорлық науқастарды қабылдап, тек соларды емдеумен айналысып жатыр.
Дәрігерлердің пікірінше, соңғы кездегі ахуал аймақта карантин шараларын қатайтуды қажет етеді. «Мемлекет басшысы Қасым-Жомарт Тоқаев індеттің таралуына қарсы күрес шаралары жөніндегі кеңесте коронавирус пандемиясының ұзақ мерзіміне дайындықты бастауды жүктеді. Мұның сыртында, зертханалық зерттеулердің тиімділігін, ПТР зертханаларының саны мен қуатын арттыруды тапсырды. Осы орайда, Үкіметке халықты дәрі-дәрмекпен қамтамасыз ету мәселесін бес күн ішінде шешуді, ал екі күннің ішінде осы жылдың наурыз-мамыр айындағыдай қатаң карантин шараларын енгізу бойынша ұсыныс әзірлеу керектігін де қадап тапсырды. Президенттің әсіресе карантин шараларын күшейту туралы ойымен біз де толық келісеміз. Өйткені тұрғындардың сақтық шараларына бейжай қарауының салдарынан қауіпті дерт дендеп барады. Қазірдің өзінде облыста ауруды жұқтырғандар саны 500-ге жетіп отыр. Мұның бәрі сақтық шараларына немқұрайлылық танытқанның кесірі, – деді облыстық аурухананың кардиология бөлімінің меңгерушісі Әбунасыр Суханов.
Бүгінге дейін облыста 232 науқас індеттен айығып, 3 адам көз жұмған.
Қостанай облысы
