Денсаулық сақтау басқармасының мәліметінше, облыста коронавирус инфекциясын жұқтырған 740 адам анықталған, 370 адам індеттен жазылды. Қазір барлық емхана мен аурухана, жедел жәрдем стансасы қалыпты режімде жұмыс істеуде. Соңғы күндері науқастанған 30 адам облыс орталығынан болса, 1 адам – Екібастұз қаласының тұрғыны. Науқастар қалалық инфекциялық ауруханаларға жатқызылған, жағдайлары қалыпты, хаттамаға сәйкес ем тағайындалды, байланыста болуы мүмкін адамдар тобы анықталды.
Ал аудандардағы емдеу орындарында 2 мың адам орналастырылған. Қосымша орындар аудандық орталық ауруханаларда ашылды. Өткен тәулікте өңірлік стационарларға 531 адам медициналық көмекке жүгінді. 285 пациентте пневмония, 180 адамда ЖРВИ анықталған. Барлығы 1429 адам пневмония және 196 адам ЖРВИ диагнозымен жатыр. Аудандық ауруханаларда медициналық персоналға жүктеме аз болғандықтан, кадрлар тарту бойынша тиісті шаралар қабылданды. Жергілікті бюджет есебінен қосымша қонақүйлерде тамақтану және тұру үшін тиісті қаражат бөлінді.
Пандемия басталған сәтте Павлодар қалалық №3 ауруханасында уақытша қарау мекемесі ретінде 385 орын ашылды. Сондай-ақ кардиоорталық ғимаратында 135 орын ашылды. Г.Сұлтанов атындағы облыстық ауруханада 282 орын дайындалды. Кеше қалалық №1 ауруханада қосымша 200 уақытша қарау орны әзірленді. Дәрілердің қай дәріханаларда бар екені жөніндегі ақпарат қалалық әкімдіктің Instagram парақшасында жарияланады.
– Қосымша орындар ашу арқылы провизорлық төсек саны 1232-ден 1672-ге дейін өсті. Егер бұрын симптомдары коронавирус инфекциясын жоққа шығармайтын барлық пациент Павлодар, Екібастұз және Ақсу қалаларындағы провизорлық стационарларға жатқызылса, енді ауыл тұрғындары COVID-19 күдігі болған жағдайда орталық аудандық ауруханаларға орналасады. Әр ауданда провизорлық төсек-орындар ашылды немесе провизорлық карантиндік төсек-орын ретінде қайта бейімделді. Мысалы, Шарбақты аудандық ауруханасында 100 төсек-орын ашылды. Тағы бір 160 орындық провизорлық госпиталь балалардың туберкулезге қарсы шипажайында дайындалды.
Облыс әкімі Әбілқайыр Сқақов өңір тұрғындарына жеке парақшасында жиі үндеу жариялап, карантин шараларын берік ұстануға және дәрігерлерді қолдауға шақырады. Сондай-ақ облыстық денсаулық сақтау басқармасы басшылығымен және ауруханалардың бас дәрігерлерімен онлайн режімде эпидемиялық жағдайды талқылап, қажетті шаралар жоспарын қабылдады.
«Әрқайсымыз себепсіз далаға шыға бермей, адамдар көп шоғырланған жерден аулақ болып, барлық қауіпсіздік шараларын ұстанатын болсақ, аурудың таралуын бәсеңдетеміз. Үйде қалған бір күн сізді ауруханадағы екі аптадан сақтай алады. Карантинді күшейту – бұл қажетті шара. Карантинді күшейту адамдардың көптеп жиналуын болдырмаудың жалғыз жолы болып көрінеді. Карантин шараларын адамдар өз денсаулықтарына немқұрайлы қарамай, барлығына түсінушілік танытқан жағдайда ғана тоқтатуға болады», деді облыс әкімі Ә.Сқақов.
Павлодар облысы
