Орталық музейде "Елбасы және Ұлттық ұлан" кітабының тұсаукесері өтті

Елбасы • 03 Шілде, 2020

Орталық музейде "Елбасы және Ұлттық ұлан" кітабының тұсаукесері өтті

184 рет көрсетілді

Ұлттық ұланның Орталық музейінде "Елбасы және Ұлттық ұлан" кітабының онлайн-тұсаукесері өтті. Еліміздің Тұңғыш Президенті Нұрсұлтан Әбішұлы Назарбаевтың мерейтойына орай шығарылған. Бұл туралы Ұлттық ұланның баспасөз қызметіне сілтеме жасай отырып Egemen.kz хабарлайды.

Айым ДӘУІТ

Кітапта Елбасы Қазақстанның құқықтық тәртіп әскерлерінің қалыптасуы мен дамуында айрықша рөл ойнайтыны баяндалады. Кітаптың тұсаукесері санитарлық-эпидемиялық талаптарды сақтай отырып, басшылықтың, ардагерлердің және әскерлердің шектеулі санының қатысуымен болды.

1992 жылы 10 қаңтарда Қазақстан Республикасы Президентінің Жарлығымен Қазақстан Республикасы ІІМ Ішкі әскері құрылды. 2014 жылдың 21 сәуірінде Қазақстан Республикасы Президентінің Жарлығымен Қазақстан Республикасы ІІМ Ішкі әскері Қазақстан Республикасының Ұлттық ұланы болып қайта құрылуын ұйымдастырды.

Ал 2015 жылдың 10 қаңтарында Қазақстан Республикасы Президенті Қазақстан Республикасының "Қазақстан Республикасының Ұлттық ұланы туралы" Заңына қол қойды. Қазақстан Республикасының Ұлттық ұланы Қазақстан Республикасының Ішкі істер органының бірыңғай жүйесіне кіреді, яғни жеке адам мен азаматтың конституциялық құқығы, қауіпсіздігі, қоғам құндылықтары, мемлекет тұрақтылығы мен тыныштығын қауіп-қатерлерден қорғау.

Осы сәттен бастап тарихы Тұңғыш Президент – Елбасының есімімен тығыз байланысты құқықтық тәртіп әскерлерінің жылнамасындағы жаңа кезең басталды.

Ұлттық ұлан Бас қолбасшысының тәрбие және әлеуметтік-құқықтық жұмыстар жөніндегі орынбасары Мұхаметқали Сатов Нұрсұлтан Назарбаевтың Ұлттық ұланның қалыптасуындағы ерекше рөлін атап кетті.

– Тұңғыш Президент Жарлығымен Ішкі әскерлер Қазақстан тәуелсіздік алған соң күштік құрылымдардың арасында алғашқылардың бірі болып құрылды. Әскер елімізбен бірге қатайып, айбыны асқақтады және құқық тәртібі әскерлерінің жауынгерлері өздерінің әскери антқа адалдығын, әрқашан азаматтардың құқығы мен бостандығын қорғауға дайын екендігін талай мәрте дәлелдеді.

Бүгінгі кітаптың тұсаукесері елордалық жедел бригада – 5573 әскери бөлімінде өткізілуі де кездейсоқтық емес. Өйткені 2014 жылы Елбасы осы әскери қалашықты өзі келіп ашып, жеке құрамға Жауынгерлік туды табыс еткен болатын. Елбасының ұдайы қамқорлығының арқасында әскердің кадрлық және техникалық әлеуеті артып, жақсы жарақтандырылған және мобильді бөліністердің біріне айналды, – деді өз сөзінде Ұлттық ұлан Бас қолбасшысының тәрбие және әлеуметтік-құқықтық жұмыстар жөніндегі орынбасары Мұхаметқали Сатов.