Аймақтар • 06 Шілде, 2020

Дәрі-дәрмек тиелген көлік Алматыдан Атырауға жетті

516 рет көрсетілді

Облыс әкімі Махамбет Досмұхамбетовтің тапсырмасымен дәрі-дәрмек тапшылығы мәселесі оң шешіліп жатыр, - деп хабарлайды Egemen.kz.

"Бірнеше күн бұрын облыс әкімі Махамбет Досмұхамбетов дәрі тапшылығы мәселесін жедел түрде шешуге қатысты тиісті тапсырма берген болатын. Соған сай, Алматыдан қажетті дәрі-дәрмектерді шұғыл түрде жеткізуді қамтамасыз еттік. Дәрілер дәріханаларға бұрынғы бағасымен беріледі. Ал, дәріханалардың бағаны қымбаттатпау қатаң қадағаланады", -деді облыс әкімінің орынбасары Ержан Әбілханов.

"INKAR" ЖШС Атырау филиалының директоры Светлана Липатованың айтуына қарағанда, дәрі-дәрмектің 430 түрі әкелінген. Оның 50-ге жуығы – антибиотиктер, азитромицин, цефазолин, цефтриаксон және инъекцияға арналған лидокаин ерітіндісі сынды препараттар.

"Аса қажетті дәрі-дәрмектердің Алматы қаласынан жылдам жеткізілуіне қала әкімдігі логистика жағынан қолдау көрсетті. Әйтпесе, теміржолмен жеткізілер болса, жолда көп уақыт жоғалтар еді. Әкелінген дәрілік өнімдер облыс орталығынан өзге аудандарға да жеткізіледі. Бұл партия облыстың сұранысын қамтамасыз етеді",- дейді Светлана Липатова.

Атырау облысының әкімдігі дәрі-дәрмектерді барлық дәріханаға жеткізуді ұйымдастырып, бақылауында ұстағалы отыр. Сондай-ақ, алдағы уақытта препараттардың бағасының белгіленген мөлшерден аспауын қадағалайды. Дәрі-дәрмектің әр адамға тиесілі мөлшерден артық сатылмауы үшін облыс әкімдігі мен Атырау облысы фармацевтика саласында еңбек ететін жеке кәсіпкерлер мен заңды тұлғалардың қауымдастығы – "ФармҚауымдастық" қоғамдық бірлестігі және облыстық тауарлар мен көрсетілетін қызметтердің сапасы мен қауіпсіздігін бақылау департаменті арасында арнайы меморандумға қол қойылмақ.

Соңғы жаңалықтар

Адасқан балалар аман-есен табылды

Аймақтар • 07 Тамыз, 2020

Ұқсас жаңалықтар