25 адам ішімдіктен уланып қайтыс болды

Аймақтар • 08 Шілде, 2020

25 адам ішімдіктен уланып қайтыс болды

268 рет көрсетілді

Ақмола және Қостанай облыстарында арақтан уланып қайтыс болғандардың саны 25 ке жетті, - деп хабарлайды Egemen.kz. Бұл туралы Qazaqstan.tv мәлімдеді.

Динар КЕРІМ

Ақмола облысында ащы судан 12 адам тіл тартпай кетті. Олар Атбасар және Жақсы аудандарының тұрғындары. Тағы 6 адам ауруханада жатыр. Тексеріс барысында құрамында спирті бар ішімдік Атбасарда әзірленгені белгілі болды. Қауіпті ішімдікті дайындап, сатқан 3 күдікті қолға түсті. Олар Петропавл қаласынан 5 тонна спирт сатып алып, оны басқа да сұйықтықтармен араластырып, 5 литрлік құтыларда саудалаған. Оның құрамындағы метанол заты қалыпты көрсеткіштен 20 есе көп екені анықталды.

Бұл сұйықтық адам денсаулығына өте қауіпті. Сондықтан оны тұтынуға болмайды. Қазіргі уақытта белгісіз сусынды сауда айналымынан алу бағытында жұмыстар жүріп жатыр. Облыс бойынша тарап кетуі әбден мүмкін. Полиция департаментінің мамандары жұмылдырылған. Спирт қосылған сусын заңсыз саудаланады. Сондықтан тұрғындарды сақ болуға шақырамын, - дейді Облыстық тауарлар мен көрсетілетін қызметтер сапасын бақылау департаментінің басшысы Айнагүл Мусина.

Арқалықта да арақтың кесірінен 13 адам өлім құшты. Үшеуі ауруханада жатыр. Біреуінің жағдайы аса ауыр. Науқас жан сақтау бөлімінде жасанды тыныс алу құрылғысымен жатыр. Қазір өңірде адам өліміне әкеп соқтырған ішімдікті тәркілеу бойынша жұмыс жүріп жатыр. Алайда, мамандар ішімдіктің көп бөлігі сатылып кетуі мүмкін дейді. Қазір сотқа дейінгі тергеу амалдары басталған.

Күннің маңызды және өзекті жаңалықтарын «Егемен Қазақстан» телеграм каналынан оқыңыз