Базардың кіре беріс қақпасындағы қарауыл да «бетперде тағып, ара қашықтық сақтап жүріңдер» деген жаттанды сөзді айта-айта шаршаған секілді. Ал беті ашық-шашық азық-түлікті, бейғам халықты көріп көңілге секем кіреді.
Қалада індет жұқтырғандардың саны 3151 болды. Сәт санап өскен көрсеткіш, әлеуметтік желідегі қаралы хабарлар, емханалардағы төсектік орын тапшылығы, дәріхана алдындағы ұзын сонар кезек, уақытша ашылған емдеу орталықтары отандық медицина саласы мамандарының жүйкесіне ауыр салмақ салып жатыр.
Шымкенттік жедел жәрдем дәрігері Арман Хамзиннің көңіл күйге ерік берген бейне жазбасынан-ақ Шымкенттегі дәрігерлер қауымының жұмысы ауыр екенін аңғаруға болады.
Жергілікті әкімдік тарапынан тексеру жұмыстары жүргізілгенімен, кәсіпкерлік нысандар жұмысын уақтылы тоқтата қойған жоқ. Абай ауданы бойынша құрылған 4 мобильдік топ кешкі мезгілде дүкендер мен дәмханалардың уақтылы жабылуына күнделікті мониторинг жұмыстарын жүргізуде. Дейтұрғанмен, тексеру тобы кетісімен қайта жұмысын жалғастырып, немесе «жабық» режімде жұмыс істеп жатқаны тағы бар.
Мұндай тексеру жұмыстары нәтижесінде Еңбекші ауданына қарасты Тәуке хан даңғылы, Елшібек батыр және Ш.Уәлиханов көшелері бойында орналасқан 187 коммерциялық нысанға рейдтік іс-шара жүргізілген. Аталған ауданда 38 коммерциялық құрылымға ескерту берілді. Ал, Абай ауданы аумағында карантин режімін сақталмаған 4 кәсіпкерлік нысанға хаттама толтырылды. Жалпы, қала бойынша карантин талабына бағынбай, кешкі мезгілде жұмыс істеп жатқан 50-ге жуық мекемеге хаттама толтырылған. Санитарлық нормаларды сақтамаған 7 кәсіпкерлік нысан уақытша жабылды. «Тәртіпке бағынған құл болмайды», дегендей, індеттің іргесін кеңге жаймас үшін халыққа бірінші кезекте қатаң сақтану қажет. Алайда халық күнкөрістің қамы үшін көшеге шығып кетуде. Кейбір жекеменшік кәсіпкерлік нысандар қалтасын ойлап, бас санитар шығарған қаулыдан айналып өтуде.
Індет өршіп тұрған шақта да қаладағы «Гарант» сауда орталығы аумағында жабайы сауда қызып тұр. Смартфон саудалаушылар жаяу жүргіншінің жолын кес-кестейді. «Бетперде тағып алмайсыңдар ма?», деген жанашырлыққа қаба сақалды жас жігіт: «Алла сақтайды», деп жауап қатты... Бетперде кимегені былай тұрсын, беті ашық ыдыста бәліш пен піскен жүгері сатып жүрген азаматтарды кездестірдік. Ел тұрғындары жиі шоғырланған оңтүстік шаһардағы жағдай осылай. Індет тұрғындардың денсаулығына жеткенімен, саналарына әлі жете қоймағандай...
