ЯДРОЛЫҚ ҚАРУСЫЗДАНУДАҒЫ ОРТАҚ ҰСТАНЫМ

Парламент Сенатының Төрағасы Қасым-Жомарт Тоқаев Қазақстанға Мемлекет басшысы Н.Ә.Назарбаевтың шақыруымен арнайы келген  БҰҰ Бас хатшысы Пан Ги Мунмен кездесті. Қ.Тоқаев пен Пан Ги Мунның Астанадағы осы кездесуі халық­ара­лық қатынастар саласындағы ежел­ден әріптес достардың кездесуі  бол­ды. Қызмет бабына сәйкес олар бұ­рын да талай мәрте кездескен. Қасым-Жомарт Кемелұлы жоғары мәртебелі мейманның  Семей по­лигонында, Курчатов қала­сын­да болуына және жаһандық қарусыздану үдерістері мен ядро­лық қаруды таратпау тәртібін нығайтудағы Қазақстанның рөліне орай маңызды мәлім­де­месіне ризашылық білдірді. “Сіздің сапарыңызды қазақстан­дықтар ризашылықпен еске алатын болады”, – деді Төраға өз сөзінде. Қазақстан Біріккен Ұлттар Ұйымының саясатын жан-жақты қолдайды. Пан Ги Мун қаруды таратпау және ядролық қауіпті еңсеру са­ласындағы Қазақстанның бел­сен­ді рөлі, осы сала бойынша бе­кітілген халықаралық келі­сім­дерді біздің мемлекетіміз қатаң сақтайтыны БҰҰ-да кеңінен танымал екенін атап өтті. Ол Қазақстанның әлемдік саясат­та­ғы өзекті мәселелерге теңгерімді және нақтылы қадамдары БҰҰ Бас Ассамблеясында жақсы бел­гілі екенін, ал еліміздің Пре­зиденті Нұрсұлтан Назарбаевтың бастамалары мен іс-қимылы осынау халықаралық ұйым тарапынан түсіністік пен қолдау тауып отырғанын атап өтті. “Біз ядролық қарудан бас тарту жөніндегі Қазақстанның дана және батыл шешімін жо­ғары бағалаймыз, 29 тамызды БҰҰ Ядролық сынақтарға қарсы іс-қимылдың халықаралық күні ретінде жариялай отырып, оны та­рихи күн деп есептейміз”, деді Пан Ги Мун. Сондай-ақ ол сәуірдің ортасында ядролық қауіпсіздік жөніндегі жаһандық саммитке Қазақстан мен АҚШ басшыларының қатысуы бүкіл әлемдегі ядролық қауіпті азайту ісіне қомақты үлес болып қосылатынын атап көрсетті. Бас хатшы, сонымен қатар, халық­ара­лық құқықтың негізгі қағи­далары мен кедейшілікпен кү­реске, экономикалық және саяси реформаларды ілгерілетуге, ай­мақтық интеграция мен ынты­мақтастықты дамытуға бағыттал­ған Қазақстан басшысының маңызды бастамаларын заңна­малық тұрғыда қамтамасыз ету жөніндегі қазақстандық парла­ментшілердің қызметін жоғары бағалады. Жылы шырайлы кездесу соңында Қасым-Жомарт Тоқаев жер жүзіндегі қауіпсіздікті қамтамасыз ету жөніндегі Пан Ги Мунның қызметіне риза­шы­лық білдірді және БҰҰ Бас Ас­самблеясының өкілдерін алдағы мамырда өтетін Трансазиялық парламенттік жиынға қатысуға шақырды. Асқар ТҰРАПБАЙҰЛЫ.