Оның шарттарына сәйкес еліміз бойынша 68 жас волонтер шағын грантқа ие болса, олардың 10-ы – ақтөбелік. Жоба жеңімпаздары алдағы уақытта әлеуметтік қызмет көрсету орталықтарында тағдырдың теперішіне тап болған балалар мен жасөспірімдерге тәлімгерлік тұрғыдан қолдау көрсетпек.
Ақтөбе облыстық жастар ресурстық орталығының бөлім басшысы, жоба тәлімгері Нұрбақыт Алтынбекқызының айтуынша, өңірден жеңімпаз атанған 10 волонтер жасқа бұл бағыттағы жұмыстармен айналысу үшін бір үйлестіруші мен үш аға тәлімгер және алпысқа жуық волонтер қосылмақ. Олар өз қызметтерін өңірдегі «Аяла», «Мейірім» және «Жайна» әлеуметтік дамыту орталықтарымен тығыз байланыста жүргізуді ұйғарған. Бұл ретте бүгінгі күні тәлімгерлікке тартылғандарды онлайн форматта оқыту ісі қолға алынған. Осы шеңберде өзара танысу мен түсінісу үшін онлайн кездесулер ұйымдастырыла бастады.
«Жаңа жүйе мен тәртіп қазіргі індет жағдайына икемделе білуден туындады. Бұған қоса тәлімгерлік істің тінін одан әрі тарқату үшін әлеуметтік желілердің кең ауқымды мүмкіндігі де жұмылдырылмақ. Сонымен бірге жобаға қатысушыларға арналған YouTube желісінен канал ашылып, барлық жұмысты сол жерге шоғырландыруды ұйғардық. Бұл қадам тәлімгерлік қозғалыстың ауқымы кең әрі қолжетімді болуын қамтамасыз етуден туындады», деді бас тәлімгер.
Облыстық жастар ресурсы орталығы қолға алған жобалардың түпкі мақсаты – тағдырдың теперішіне тап болып, еркелікті көтермейтін асау өмірдің ащысына бірден кезіккен қоғамның жас мүшелеріне қол созып, қолдау көрсету болып отыр.
Орталықта оны жүзеге асырудың әртүрлі жолдары мен тәсілдері белгіленген. Соның басты бір тармағы аталған санатқа кіретін балалар мен жасөспірімдердің дүниетанымы мен ой-өрістерін дамытуды көздейді. Компьютерлік сауаттылықты жетілдіру мәселесі осы тәлімді істің бір тармағы ретінде қарастырылған.
АҚТӨБЕ
