Шаһар басшысы ең алдымен Ақсуат ауылдық округінде "Ауыл – ел бесігі" бағдарламасы аясында жүзеге асып жатқан №143 орта мектептің күрделі жөндеу жұмыстарының сапасын тексерді. 1982 жылы салынған мектеп араға 38 жыл салып күрделі жөндеуден өтуде. Нысанда ауылдың жұмыссыз жүрген 40 азаматы жұмыспен қамтылған. Қала әкімі ішкі жұмыстарда олқылықтарды анықтап, келісім шартты қайта зерделеуді жауапты сала басшыларына тапсырды.
Мұнан кейін қала әкімі ауыл орталағында орналасып, Ү.Тоқмағамбетова көшесіндегі асфальт төсеу жұмыстарын көрді.
Биыл Ақсуатта 16 көше "Ауыл – ел бесігі»республикалық бағдарламасы бойынша орташажөндеуден өтіп, оның 7 көшесіне асфальт салынса, қалған 9 көшеге қиыршық тас төселеді. Мұнан бөлек тағы бір көшеге қиыршық тас төсеу жұмыстары "Өңірлерді дамытудың 2020-2025 жылдарға дейінгі бағдарламасы" шеңберінде жүзеге асуда. Ал жергілікті бюджет есебінен 1 көшеге тас төсеу және тұрғындар үшін ауыл орталығына спорттық көше тренажерін орнатуға қаржы бөлінген. Сонымен қатар өткен жылы күрделі жөндеуден өткен "Асыл-Ай" балабақшасына қажетті жабдықтар алуға облыстық бюджеттен қаржы қаралып, жұмыстар жүргізілуде.
Қалаға қарасты ірі елдімекеннің бірі Ақжарма ауылдық округінде биыл жол мәселесі толығымен шешіледі. Аулдағы Тоғай көшесінде бұған дейін асфальт болмаған. Мұндағы жол жөндеу жұмыстарын шаһар басшысы өзі арнайы тексеріп, қалған екі-үш көшенің құрылысын осы жылы аяқтауды сала басшыларына нықтап тапсырды. Ауыл орталығында бұдан бөлек жергілікті бюджеттен спорттық көше тренажерін, жарық бағаналарын орнатуға қаржы бөлінген. Қазір ауылдық округте 6 көшеге, оның ішінде жергілікті бюджет есебінен 1, "Жұмыспен қамту жол картасы" бағдарламасына сай 5 көшеге орташа жөндеу жұмыстары жүргізілуде.
Осы күні қала іргесіндегі Наурыз саяжайында су жинау қоймасының құрылысы аяқталып, тұрғындар толық су жүйесіне қосылды. "Өңірлерді дамыту –2020" бағдарламасы аясында жүзеге асқан ауыз су жинау қоймасын "Мелиоратор" серіктестігі салды.
Қазір "Жұмыспен қамту жол картасы" бағдарламасы аясында қала бойынша 1850 адам жұмыспен қамтылған. Оның 1271-і жұмыспен қамту орталығы арқылы жолданған азаматтар.
