– Халық әртісі Әнуар Боранбаев атындағы орта мектеп жанындағы интернатқа «Алюминстрой» ЖШС құрылыс компаниясы қайта күрделі жөндеу жүргізіп жатыр. Мердігер жұмысын тапсырған соң шалғайдағы шағын ауылдардан келетін 70 шәкірт осында жатып білім алады. Аталған жобаға облыс бюджетінен 133 млн теңге қаражат бөлініп отыр. Интернаттың шатырынан су ағып, ішкі қабырғаларының сылағы түсіп, тозып кетіп еді. Құрылысшылар ғимараттың төбесін толық ашып, ескі жабынын алып тастап, орнына төзімді әрі заманауи металл шатыр жапты. Бұрынғы ескі ағаш терезелердің орнына сапалы пластик терезелер қойылды. Сонымен қатар жатын бөлмелер оңтайландырылып, ара қабырғалар қойылуда. Бұған дейін 3-4 бала бірге жатып келсе, енді бір бөлмеде екі бала ғана жататын болады, – деді мектеп интернаттың меңгерушісі Айгүл Дихамбаева.
Аудан әкімінің орынбасары Сүндет Жолдыбекұлының айтуынша, осыдан екі жыл бұрын Ә.Боранбаев атындағы орта мектеп облыс бюджетінен бөлінген 180 млн теңге қаражатқа күрделі жөндеуден өткен. Білім ошағы сол жылы 24 млн теңгеге материалдық-техникалық базасын да жаңартып алыпты.
– Білім мекемесіне қажетті барлық құрал-жабдықтар алынды. Мектептің жылу қазандығы үшін жеке ғимарат салынды. Ал мектеп жанындағы интернат көп жылдардан бері жөндеу көрмей, қиындық тудырып келген-ді. Биыл «Ауыл – ел бесігі» бағдарламасының арқасында күрделі жөндеуден өтіп жатыр, – деді аудан әкімінің орынбасары.
Аймақта жарияланған шектеу шараларына байланысты кей күндері мұнда да жұмыс тежеліп қалып жатыр. Бірақ соған қарамастан, құрылысшылар межеленген жұмыстың басым бөлігін еңсеріп тастапты. Екі қабатты ғимараттың сыртқы қабырғасы мен шатыры толық бүтінделіп, бүгінде ішкі жұмыстар жүріп жатыр. Интернат уағдалы мерзім ішінде толық жаңартылып, алдағы оқу жылының басында балалардың игілігіне айналмақ. Бұған мердігер де нық сенімді.
Қостанай облысы,
Амангелді ауданы,
Амангелді ауылы
