24 жылдың ішінде Қазақ елінің оғландары бүгінге дейін алты жазғы Олимпия ойынында бақ сынап, еліміздің намысын лайықты деңгейде қорғап келеді. Өйткені жерлестеріміз ширек ғасырға жуық уақыттың ішінде 70-ке жуық Олимпиаданың жүлдесін ел қоржынына салды. Өкінішке қарай допинг дауына байланысты бірнеше медальды кері қайтаруға мәжбүр болдық. Есесіне шетел спортшылары допингпен ұсталғанының арқасында біздің де спортшылар кешігіп жеткен жүлделеріне қол жеткізді.
Мәселен, күні кеше Халықаралық Олимпиада комитеті (ХОК) 2012 жылы Лондонда жалауы желбіреген XXX Жазғы Олимпия ойындарында 5-орын алған даңқты балуанымыз Дәулет Шабанбайға Олимпиаданың қола жүлдесін табыстады. Қандасымыз Лондон боз кілемінде 120 кило салмақта бақ сынап, қола жүлде үшін болған белдесуде ресейлік Билял Маховтан 3:1 есебімен жеңіліп қалған еді. Ал осы салмақта өзбекстандық Артур Таймазов топ жарып, грузин балуаны Давид Модзманашвили күміспен күптелген. Алайда жарыс кезінде алынған допинг сынамасы қайта тексеруден өткен соң алтын мен күмісті бөліскен екі спортшының тыйым салынған препаратты қолданғаны белгілі болды. Сөйтіп қола медаль иеленген ирандық балуан Комейл Гасеми мен Билял Махов Олимпиада чемпионы атанды. Ал осы балуандардан жеңілген Дәулет Шабанбай мен АҚШ спортшысы Тервел Длагнев автоматты түрде Лондон Олимпиадасының қола жүлдесін иеленді.
Сонымен қатар 2016 жылы ХОК үш қазақстандық спортшыға Бейжің Олимпиадасының медалі берілетінін мәлімдеді. Кейіннен бір саңлағымыздың Олимпиада чемпионы, екеуінің жүлдегер атанғаны белгілі болды.
2008 жылы Бейжіңде ұйымдастырылған төрт жылдықтың басты бәсекесінде ауыр атлет Алла Важенина 75 кило салмақта 266 (199+147) кило зілтемірді басынан асырып, күміс жүлдегер атанған-ды. Арада біраз жыл өткенде сол уақытта бас жүлдені олжалаған қытайлық спортшы Лей Цаоның тыйым салынған препарат қолданғаны дәлденіп, ХОК және CAS (Спорттық арбитраж сот) оны спорттан шеттетті. Содан соң Халықаралық ауыр атлетика федерациясы (IWF) жүлделерді қайтадан реттеп, Алла Важенинаға Олимпиаданың алтынын табыстады. Бүгінде Важенина Ресей азаматтығын алған және сол елде тұрып жатыр.
Бейжіңдегі бәсекеде жүлдеге сынық сүйем қалғанда сүрініп, жарысты төртінші орынмен аяқтаған Ольга Рыпакова 8 жылдан соң күміс жүлдегер болып шыға келді. Үш қарғып секіруден Олимпиаданың күмісі мен қоласын иеленген Татьяна Лебедева мен Крисопиги Деветци де допингпен ұсталып, жүлделерінен айырылды. Бір қызығы, Рыпакова Олимпия ойындарының толық жүлде жиынтығын иеленген еліміздегі бірінші спортшы атанды. Оның қоржынында енді Лондон Олимпиадасының алтын, Бейжіңнің күміс және Рионың қола жүлдесі бар.
2016 жылға дейін грек-рим күресінен Бейжің Олимпиадасының қола жүлдегері атанып келген Нұрбақыт Теңізбаевтың да қоласы араға 8 жыл салып күміске ауысты. Өйткені ХОК Бейжіңде екінші орын алған әзербайжандық Виталий Рагимовтің нәтижесін жоққа шығарып, қазақ балуанына күміс жүлдені табыстады. Айта кетейік, Теңізбаев Олимпия ойындарының жартылай финалында дәл осы Рагимовтен 8:1 есебімен жеңілген еді.
Ал 2012 жылғы Лондон Олимпиадасында 69 кило салмақта сынға түскен ауыр атлет Анна Нурмухамбетова қоссайыс қорытындысы бойынша 251 (115+136) кило зілтемірді көтеріп, небәрі бесінші орынмен елге оралған болатын. Алайда арада төрт жыл өткенде қола жүлде мен төртінші орын алған Беларусь елінің екі спортшысы – Марина Шкерманкова (қола) мен Дина Сазановецтің (4-орын) допинг қолданғаны анықталып, Шкерманковадан ХОК жүлдесін қайтарып алды. Осылайша, бесінші орында қалып қойған Нурмухамбетова 2016 жылы Олимпиаданың қола жүлдегері атанды.
Осыдан төрт жыл бұрын Бразилияның Рио-де-Жанейро қаласында өткен Олимпия ойындарының ауыр атлеттер сайысында 85 кило салмақ дәрежесінде өнер көрсеткен Денис Уланов жарысты төртінші орынмен қорытындылаған болатын. Қоссайыста ол 390 (175+215) кило салмақты еңсерді. Үшінші орынға табан тіреген румыниялық Габриэль Синкраянның да нәтижесі дәл сондай еді. Десек те Синкраян салмағының аздығы арқасында қола медальды еншіледі.
Рио Олимпиадасы аяқталғаннан кейін бірқатар зілтеміршінің допинг қолданғаны анықталды. Солардың қатарында Габриэль Синкраян да бар. Істің ақ-қарасы анықталғаннан кейін румыниялық зілтемірші Олимпиаданың қола жүлдесінен айырылып, үлкен спорттан бірнеше жылға шеттетілді. Сөйтіп Риодағы доданың қола медалі Денис Улановқа табыс етілді.
Алмақтың да салмағы бар дегендей, Халықаралық Олимпиада комитеті де Қазақстанның біраз медалін кері қайтарып алды. Өкінішке қарай, қазақ спортшылары жеңіп алған 2008 жылғы Бейжің Олимпиадасының 5 жүлдесін, 2012 жылғы Лондонда өткен доданың төрт бірдей алтынын араға жылдар салып ХОК өзінің лайықты иелеріне табыстады.
Атап айтар болсақ, ауыр атлеттерден Илья Ильин (алтын), Зульфия Чиншанло (алтын), Майя Манеза (алтын), Светлана Подобедова (алтын), Ирина Некрасова (күміс), Мария Грабовецкая (қола), балуандардан Таймураз Тигиев (күміс) және Әсет Мәмбетов (қола) жүлделерінен айырылды.
