Коллажды жасаған Амангелді Қияс, «ЕQ»
Елімізде Төтенше жағдай режімінің тоқтағаны қауіпті індет жойылғандай қабылданып, барлық жерде қаннен қаперсіз қалыпты тіршілік қайта жанданды. Соның салдарынан індет кең етек алып, азаматтардың амандығына үлкен зардабын тигізе бастады. Вирус меңдеп, талай жақынымыздан көз жазып қалдық. Айналамызда бұл бәлекетке ұшырамаған ағайын кемде-кем. Ахуалдың бұлай ушығуы басқа да мәселелерді көбейтіп жіберді. Ауруханаларда орын жетпей, дәрігерлер үлгермей, жедел жәрдем уақытында көмек бере алмай халық әбден әбігер болды. Бұл аздай дәріханалар алдында дүрбелең туып, шағымданған жұрттың қарасы көбейді. Іздеген дәрі-дәрмек табылмай, табылса да құны қалта көтермей біраз қинады. Жығылғанға жұдырық болып, алыпсатарлар да дәрі-дәрмек тапшылығын тудырып, бағаны тым шарықтатып жіберді.
Осылайша індеттің өршуімен қаншама мәселе ушығып кетті. Бұл жағдайдың оңалуына Президент бас-көз болып, Үкіметке қатаң тапсырма жүктеді. Жағдайды бақылаудан шығарып алған әкім-қаралар сөгіс алды. Содан кейін жоғарыда аталған мәселелерді реттеу үшін біраз шаруа қолға алынды. Нәтижесінде ахуал біршама тұрақтанған сыңайлы. Бұл жөнінде Үкіметтің селекторлық отырысында мәлім болды.
Жиында Қазақстанда эпидемиялық жағдайдың тұрақталу деңгейіне шыққаны аталып өтті. Республика бойынша коронавирус жұқтырғандардың өсімі 2,1%-ды құрайды. Ең төменгі өсім тәулігіне Шымкентте – 1%, Қызылорда облысында – 0,9%, Түркістан облысында – 0,8%, Ақтөбе облысында 0,5% тіркеліп отыр.
Жалпы төсектік орын қоры 30,4 мыңнан 49,7 мың төсектік орынға дейін ұлғайтылды. Провизорлық төсектік орынның бос болмауы 20%-ға (89%-дан 69%-ға дейін) және реанимациялық төсектік орынның бос болмауы 6%-ға (73%-дан 67%-ға дейін) азайды. Covid-тен сауығып кеткендердің саны 60%-ға көбейді, жедел жәрдемді шақырулар 23%-ға төмендеді.
Індетке байланысты ахуалдың қалыпқа келе бастауы туралы Денсаулық сақтау министрі Алексей Цой Орталық коммуникациялар қызметі алаңында да айтып берді. Соның бірі коронавирус инфекциясына қарсы вакцинаның қашан қолданыла бастайтыны жөнінде болды.
«Қазақстан қазіргі уақытта әртүрлі мемлекеттердің вакцинасын зерттеп жатыр. Бұған дейін айтылғандай әлем елдерінің вакциналары әртүрлі клиникалық зерттеулерден өтеді. Ресейлік вакцинаға қатысты айтар болсақ, әріптестерімізбен серіктесе жұмыс жүргізіп жатырмыз. Вакцина клиникалық зерттеулердің бәрінен өтіп, жаппай ел ішінде қолданыла бастағаны туралы ресми мәлімдеме жасалғаннан кейін ғана оны елге әкеле бастаймыз», деді А.Цой.
Оның айтуынша, Қазақстанға ең бірінші кезекте вакциналар бойынша зерттеудің нақты нәтижелері керек. Министр вакцинаның тиімділігі расталған жағдайда ресейлік әріптестермен Қазақстанға алдыңғы кезекте жеткізу мәселесі келісілгенін жеткізді.
«Вакцина шығарушы басқа мемлекеттермен де келісімге келіп отырмыз. Оның ішінде Қытайда жасалатын вакциналар бар. Қытайлық мамандар БАӘ-мен бірге клиникалық сынақтар өткізуде. Басқа да вакциналар қазір клиникалық деңгейде зерттеліп, сынақ жұмыстары аяқталуға жақын қалды. Жалпы, бәрімен байланыстамыз. Нәтиже шығатын нақты уақытты күтіп отырмыз. Әлемдік қауымдастық бұл туралы міндетті түрде хабарлайды. Осыдан кейін ғана ең бірінші кезекте қандай вакцинаны алатынымыз туралы нақты шешім қабылданады», деді министр.
Сондай-ақ ол елімізде шектеу шаралары алынып тасталған кезде коронавирус инфекциясы ешқайда жоғалып кетпегенін естен шығармау керек екенін айтты.
«Біз оған үйреніп, күресіп, өмір сүруіміз керек. Өмір жалғасады. Әр адам ауа райына бейімделеді. Жаңбыр жауса, біз қолшатыр алып, өзімізді судан қорғаймыз. Күн суыса жылы киім киеміз. Мұндайда тіпті ойланбаймыз, бәрі қалыпты жағдай. Қандай шара болсын бәрі қашықтан өтуі керек. Егер инфекция болса, қандай да бір эпидемиялық кезең басталса немесе ауа арқылы инфекция тараса, маска тағу, жақындарыңызды қорғау, әлеуметтік қашықтықты сақтау қалыпты жағдайға айналуы керек. Егер қандай да бір шара болса, адамдар бір-бірінен алшақтап, алыстап отыруы керек. Қазір инфекция қатты өршіп кетеді деп күтпесек те, бұл біздің қалыпты өмірімізге айналуы тиіс», деді А.Цой.
