Қостанай қаласындағы №4 емханада күн сайын таңғы сағат 8:00-ден түнгі 00:00-ге дейін 5 мобильді бригада жұмыс істейді. Індетке қарсы күресті күшейту мақсатында жасақталған жаңа қызмет тобының құрамында дәрігер мен медбике бар. Олардың әрқайсысы арнайы автокөлікпен қамтамасыз етілген. Бас дәрігер Маргарита Бисенованың айтуынша, 3 мобильді топқа емхананың өз көліктері бекітіліпті, қалған топтарға жергілікті такси компанияларының бірі күніне екі автокөліктен бөліп отырады.
– Алдымен емханаға қоңырау шалған тұрғынның жай-күйін анықтап аламыз. Қызуы нешені көрсетіп тұрғанын, қай жері ауыратынын, неше күннен бері жайсыз күйге түскенін, жөтелінің бар-жоғын, ПТР-і оң нәтиже көрсеткен науқастармен байланыста болған-болмағанын сұраймыз. Дене қызуы 38 градусты көрсетіп тұрса, мобильді топ дереу науқастың мекенжайына аттанады. Ал қызуы 38-ден төмен науқастарды емхана мамандары қашықтан бақылап, күн сайын жиі-жиі қоңырау шалып, күтініп, көп су ішуге кеңес беріп отырады. Мұндайда дене қызуын үнемі қадағалап отыру керек. Қызу 38 градусқа дейін болса, ешқандай дәрі ішудің қажеті жоқ, ал қызу көтеріліп жатқан жағдайда, таңертең және кешке парацетомол ішу керек, – дейді М. Бисенова.
Облыс орталығында орналасқан емханалық мобильді топтар 25 маусымнан бері жұмыс істеп келеді. Мобильді бригаданың жұмыс алгоритмі – қарапайым. Емханаға қоңырау түскен соң, топ құрамындағы дәрігер мен медбике дереу науқастың үйіне барып, жағдайын тексереді. ПТР-ға талдау алу керегін немесе керек емес екенін анықтайды. Осылайша, жан-жақты тексеріп, ем шараларын тағайындайды. Егер науқасты міндетті түрде стационарға жатқызу қажет болса, мобильді топ сол жерде ПТР-ға талдау алып, жолдама жазады. Одан кейін күдікті науқасты жедел провизорлық стационарға апарып жатқызу үшін көмек шақырады.
Бір мобильді топ тәулігіне 20-25 рет шақырту бойынша мекенжайға шығады. Олардың жұмысын індетке қарсы күрестің тиімділігін арттыру мақсатында арнайы құрылған Call-орталық үйлестіреді. Бұл орталықтың жұмыс кестесі 12 шілдеге дейін дүйсенбі-жұма күндері сағат 09.00 мен 18.00 аралығында болған, қазір апта бойы демалыссыз, сағат 09.00-ден 18.00-ге дейін қоңырау қабылдайды. Әр ауысымға төрт қызметкер екі-екіден кезектесіп шығады. Пандемияға дейін Call-орталыққа күніне 100-ге тарта адам хабарласса, қазіргі уақытта 200-ге дейін қоңырау келіп түседі.
–Тұрғындар негізінен короновирус пен пневмонияға қатысты сұрақтар қояды. Біз дәрігерге қаралуды ескертіп, мамандардың, медицина ұйымдарының байланыс телефонын, басқа да тиісті ақпараттарды айтамыз. Сонымен қатар «дәрі-дәрмек жетіспей жатыр» деп шағым білдіргендер де кездеседі. Олардың іздегенін сұрастырып, дәріханалардың анықтама телефондарын тауып береміз. Мысалы, бүгін Лисаков қаласынан дәрі тапшылығы мәселесіне байланысты бірер қоңырау түсті. Оларға да осылай жөн сілтедік, – дейді Call-орталық маманы Ирина Функ.
Мұнда қоңырау соғушылардың жас шамасы әртүрлі, жастар да, қарттар да түрлі өтініштерімен хабарласып жатады. Мынау өңір нақты белсенді деп те айту қиын. Бірақ салыстырмалы түрде алып қарағанда Call-орталықты жиі мазалайтын қалалықтар дегенді айтады мамандар. Дәрігер-мамандардың айтуынша, мобильді бригадалар індетке қарсы күрестің тиімділігін арттыра түседі. Мұндай жедел әрі шағын топтар арқылы біріншіден, емханаларда кезек күткен адамдар саны едәуір азаяды. Екіншіден, санитарлық қауіпсіздік қамтамасыз етіледі, яғни науқас үйінде ем алатындықтан, оның індет жұқтыру тәуекелі азаяды. Үшіншіден, онсыз да жұмысы қауырт емхана дәрігерлерінің кезекке тіркелген науқастарға бөлетін уақыты молаяды. Қалай десек те, бүгінгі жағдайда науқастарды қашықтан емдеудің маңызы зор.
Біз әңгіме еткен №4 емханадағы мобильді топтар тәулігіне 130-150 адамға дейін дәрігерлік көмек көрсетеді. Ал Қостанай қаласындағы шағын медициналық топтардың барлығы күніне 2 мыңнан астам науқасқа ем-дом шараларын жасайды. Қазір облыста жалпы саны 74 мобильді топ тынымсыз жұмыс істеп жатыр.
Қостанай облысы
