«Нұр Отан» ХДП Ақтөбе облыстық филиалында «Қазақстан ардагерлері» Ауған соғысы ардагерлері ұйымдары ассоциациясының және «Ауған соғысы интернационалист-жауынгерлері Ақтөбе облыстық қоғамдық бірлестігі» облыстық ұйымының ұйымдастыруымен «Біз өз Отанымыздың болашағына жауаптымыз» атты бірінші республикалық форумы өткізілді.
«Нұр Отан» ХДП Ақтөбе облыстық филиалында «Қазақстан ардагерлері» Ауған соғысы ардагерлері ұйымдары ассоциациясының және «Ауған соғысы интернационалист-жауынгерлері Ақтөбе облыстық қоғамдық бірлестігі» облыстық ұйымының ұйымдастыруымен «Біз өз Отанымыздың болашағына жауаптымыз» атты бірінші республикалық форумы өткізілді.
Форумға еліміздің барлық облыстарынан Ауған соғысының ардагерлері қатысты. Ауған соғысының от-жалынына шыңдалған азаматтар жастарға патриоттық тәрбие беру, жас ұрпақты діни экстремизмнен қорғау, олардың салт-дәстүрімізге жат діни ағымдарға бой алдырмауына ұйытқы болу және өз елінің патриоты етіп тәрбиелеу мәселелерін талқылады.
Форумды кіріспе сөз сөйлеп ашқан облыстық ішкі саясат басқармасының басшысы Зәпен Жұмабаева Ауған соғысы ардагерлері облыстық ұйымы жүргізіп отырған патриоттық тәрбие жұмыстарын, оның жастардың қоғамдағы өз орнын табудағы рөлін атап өтті. Сондай-ақ, ауғандық жауынгерлердің қоғамдық жұмыстарға белсене қатысатыны туралы да әңгімеледі. Облыста ауған жауынгерлерінің коммуналдық қызметтер төлемдерінен босатылғанын тілге тиек етті. Мұндай игілік тек Ақтөбе облысында ғана бар екенін жеткізді.
Парламент Мәжілісінің депутаты, «Қазақстан ардагерлері» Ауған соғысы ардагерлері ұйымдары ассоциациясының төрағасы Бақытбек Смағұл қаруластарын еліміздің ертеңі – жастарды өз Отанының патриоты етіп тәрбиелеуге атсалысуға шақырды. Жастардың бойында отансүйгіштік, патриоттық сезімді қалыптастыру қажеттігін сөз етті. Жастарды ұлтжанды және өз елінің абзал азаматы болуға шақырды. Қазақстанның жарқын болашағы жастардың қолында деген ой айтты.
Шараға қатысушылар атынан Қазақстанның барша азаматтарына үндеу қабылданды. Онда елімізде діни экстремизмді және терроризмді болдырмау, жастарға әскери-патриоттық тәрбие беруге атсалысу әрбір қазақстандықтың парызы екені баяндалған.
Шара аясында «Ауғанстан. Жауынгер-интернационалист ерлігі» атты кітаптың тұсаукесері болды. Кітапта Ауған соғысында өзінің қарулас жолдастарымен ерліктің ерен үлгісін көрсетіп қаза тапқан жерлесіміз, интернационалист-жауынгер Серікбай Тұрлыбаевтың жауынгерлік биік тұлғасы деректі негізде сипатталады. Кітаптың тұсаукесеріне Серікбайдың анасы Сәпен апа қатысып, ауғандық ардагерлерге ұлының ерлік істерін жастар арасында насихаттап, өнеге еткендері, оның бейнесін естерінде сақтағаны үшін жүрекжарды алғыс сезімін білдірді.
Сатыбалды СӘУІРБАЙ,
«Егемен Қазақстан».
Ақтөбе облысы.
