КЕЛІСІП ПІШКЕН ТОНДАЙ...

Алматыда билік пен үкіметтік емес ұйымдар өкілдері іс-қимыл бірлігі мәселелерін талқылады Жақында әуелі қала әкімдігінде “Қоғам және билік: әлеуметтік әріптестік көкжиегі” атты іске асы­рылған әлеуметтік мәнді жобалар көрмесі болып өтті. Онда мемле­кеттік тапсырыс аясында үкіметтік емес ұйымдар жүзеге асырған бір­та­лай жобалар көрсетіліп, жұрт­шы­лыққа таныстырылды. Осы іс-шара барысында үкіметтік емес ұйым­дардың іс-қимыл бірлігі мен ынты­мақтастық жөніндегі қоғамдық кеңесінің отырысы өткізіліп, оған қала әкімі Ахметжан Есімов төр­ағалық етті. Отырыс кезінде үкіметтік емес ұйымдардың өкілдері қалалық құ­ры­лымдардың жетекшілерімен бірлесе отырып, билік пен қоғам­дық сектордың әлеуметтік әріп­тестігін одан әрі дамытуға қатысты мәселелерді кеңінен сөз етті. Қала әкімі әлеуметтік әріптестіктің қол­жетімді әрі тиімді тетіктері қажет­тігін ерекше атап көрсетті. “Келісіп пішкен тон келте болмас” деген­дей, осынау отырыстың негізгі мақ­сатының өзі де атқарушы орган­дармен іс-қимыл бірлігінің пайдасын бағамдап, барлық ком­мерциялық емес ұйымдардың күш-жігерін топтастыру мақсатын көз­дегені де анық. Бүкіл ел бойынша тіркелген қоғамдық ұйымдардың қырық пайызы Алматыда жұмыс істейді екен. Ендеше, қала басшы­сының осынау жайға баса назар аударғаны да түсінікті болса керек. Осыған орай өзара ынтымақ­тас­тықтың көкжиегі мен келешегі туралы қоғамдық ұйымдар өкілдері де өз ой-пікірлерін бүкпесіз ортаға салды. Алматыдағы Қоғамдық кеңес республикада алғашқы болып 2009 жылы құрылғанынан хабардар едік. Оның консультативтік-кеңесшілік орган ретіндегі мәртебесі және бар. Мұнда жұртшылық пен әкімдік өкілдері әртүрлі мәселелерді үнемі бірлесіп талқылайды. Кеңес өз отырыстарының қорытындылары бойынша қандай да бір проблема­ларды шешудің жолдарын нұсқаған өз ұсыныстарын тиісті құзырлы орындар мен мемлекеттік орган­дарға жолдап отырады. Қала әкім­дігі әлеуметтік тапсырыс арқылы үкіметтік емес ұйымдарға бірқатар өкілеттіктерді беруді игі дәстүрге айналдырып келеді. Бүгінгі оты­рыста мәлім етілгендей, қалалық өкімет орындары үкіметтік емес ұйымдармен өзінің осы бағыттағы өзара тығыз қарым-қатынасын ке­ңейте түсуді ұйғарған. Сонымен бірге, Алматының әкімдігі қала­лық мәслихат қарауына үкіметтік емес ұйымдарды қаржыландыру­ды екі есе ұлғайту жөнінде ұсы­ныс енгізіп отыр. Осыған орай жұрт­шылық өкілдері мұндай ашық үн қатысуға және өз ұсы­ныстары мен сын-ескертпелерін енгізу мүм­кіндігі үшін алғыс­тарын білдірді. Отырыс соңында қала әкімі 2009 жылы жүзеге асырылған әлеу­меттік мәнді жобалар көрмесінің жеңімпаздарын құттықтап, оларға марапат грамоталарын тапсырды. Орындалған жобаның үздік тұсау­кесері ұсынымында оралмандардың “Асар” республикалық қоғамдық бірлестігі, халыққа әлеуметтік қызмет көрсетудегі озық тәжірибе ұсынымы бойынша “Шырақ” мүгедек әйелдер қауымдастығы, әлеуметтік мәнді жобаларды ұзақ мерзімді іске асыру келешегі ұсынымы бойынша Қазақстанның дағдарыс орталықтары одағы жеңімпаз атанды. Қорғанбек АМАНЖОЛ.