Тамызда күн райы қандай болмақ?

Оқиға • 27 Шілде, 2020

Тамызда күн райы қандай болмақ?

366 рет көрсетілді

Орталық коммуникациялар қызметінде өткен баспасөз мәслихатында «Қазгидромет» РМК директоры Данара Әлімбаева тамыз айының ауа райы болжамын жариялады.

Рауан Қайдар

«Тамыз – жаздың соңғы айы. Ауаның орташа температурасы тамыз айында шілде айына қарағанда солтүстікте 2-2,5 градусқа, ал оңтүстік облыстарда 1 градусқа төмен болады. Қазақстанның солтүстігінде ауаның орташа айлық температурасы 16-20 градусқа, оңтүстікке қарай жоғарылай отырып қиыр оңтүстікте 27-29 градусқа жетеді. Консультативті болжамға сәйкес жаздың соңғы айы климаттық норма шамасында болады деп күтілуде. Тамызда ауаның орташа айлық температурасы Қазақстан аумағының басым бөлігінде қалыпты болады. Солтүстік жартысында норма – 17-22 градус», деді Данара Әлімбаева.

Оның айтуынша, шығыс аймақтардың таулы-бөктерлі аудандарында 15-16 градус, батыс және оңтүстік аймақтарда 23-27 градус шамасында сақталады. Ауа температурасы қалыпты шамада болады.

«Осыған қарамастан ауа массаларының жиі алмасуына байланысты жауын-шашынсыз ыстық күндер мен салқын, жауынды күндер қатар болады. Бұл Скандинавия аймағынан суық ауа массаларының енуіне және Жерорта теңізі мен Ираннан шығатын оңтүстік циклондармен байланысты. Тамыз айында жауын-шашын мөлшері ресупбликаның басым бөлігінде қалыпты болады. Республиканың оңтүстігінде қалыпты – 2-9 мм, батыс пен орталық – 11-24 мм. Нормадан көп күтілетін өңірлер: Солтүстік Қазақстан облысында – 40-53 мм, Қостанай облысында – 17-55 мм, Ақмола облысында – 20-41 мм, Павлодар облысының солтүстік батысында – 23-40 мм, Қарағанды облысында – 11-17 мм, Батыс Қазақстан және Ақтөбе облыстарының солтүстігінде – 17-27 мм, Алматы облысының таулы және тау-бөктерлі аудандарында – 18-90 мм», деді «Қазгидромет» РМК директоры.

Күннің маңызды және өзекті жаңалықтарын «Егемен Қазақстан» телеграм каналынан оқыңыз