Аймақтар • 28 Шілде, 2020

Құлпытасқа қашалған орден

243 рет
көрсетілді
5 мин
оқу үшін

Қостанай облысында COVID-19 анықталған алғашқы науқас 31 наурызда тір­келді. Содан бері жойқын індетке қарсы жан алып, жан беріскен майдан ала­ңына айналған палаталарда ақ халат киген жүздеген жауынгер шыбын жанын шүберекке түйіп, адам өмірі үшін арпалысып жүр. Оқ атылып, бомба жа­рылып жатқан жоқ. Бірақ кәдімгі сұрапыл соғыс жүріп жатыр. Каска орны­на маска киген қатардағы қарапайым медбикелер зеңбіректің орнына от­тегі бал­лондарын сүйретіп, алдыңғы шепте жүр. Өкініштісі, аймақта үш жа­рым айдың ішінде 81 дәрігер вирус жұқтырып, екі медицина қызметкері көз жұмды.

Құлпытасқа қашалған орден

Өзгенің өмірі үшін басын қатерге тіге жү­ріп індет тырнағына ілініп, өзі жұмыс іс­тейтін инфекциялық бөлімде көз жұм­ған медбикенің бірі – Елена Ново­с­елова. Бұған дейін Жітіқара мек­теп­те­рінің бірінде медбике болып жүрген Елена қалаға төтенше жағдай режімі енгі­зілісімен короновирус індетіне қар­сы күреске бел шешіп кіріскен әріп­тестерінің алдыңғы қатарында бол­ды. Сәуір айының соңында ең алғаш­қы­лар­дың бірі болып коронавирус белгісі анық­талған науқастар жататын арнайы бөлім­ге ауысып келді.

– Елена Анатольевна көп жылдық еңбек тәжірибесі бар білікті маман еді. Әріптестерінен ешқашан көмегін аямай­тын. Жұмыс барысында, иә басқа кезде болсын айналасына үнемі шуақ шашып, әсіресе жас медбикелерге қамқор болып жүретін. Науқастың жай-күйін қабағынан танитын нағыз дәрігер маман еді. Лена апайды бүкіл ұжым болып ерекше құрмет тұттық. Елена Анатоль­евна 1965 жылы 31 мамырда Жіті­қара қаласында дүниеге келді. 30 жыл ғұмырын туған жеріндегі аудандық аурухана қабырғасында өткізген білікті медбике өмірінің соңына дейін антына адал болып, ақтық демі қалғанша коронавирус инфекциясына қарсы күресті, – дейді аудандық аурухананың бас дәрі­ге­рі Рүстем Айтбаев.

Ақ желеңді абзал жанның ерлігін мемлекет елеусіз қалдырған жоқ. Елена Анатольевна Новоселова қызметтік бо­ры­шын өтеу кезіндегі табандылығы мен жанкештілігі және мемлекет пен халыққа сіңірген өлшеусіз еңбегі үшін ел Президенті Қасым-Жомарт Тоқаевтың Жарлығымен «Құрмет» орденіне лайық деп танылды. Жоғары мемлекеттік марапатты аудан әкімі Абай Ыбыраев марқұмның қызы Викторияға табыс етті. Салтанатты рәсімге орден иесінің отбасы мен туыстары, денсаулық сақтау бөлімі мен білім беру бөлімінің басшылары қатысты.

– Коронавирусқа қарсы күресіп жат­қан дәрігердің әр күні – ерлік. Біз Елена Анатольевнаның жарқын бей­не­сін ешқашан ұмытпаймыз. Ол бо­йын­дағы ізгілік шуағын өзімен бірге ала кет­кен жоқ. Көзі тірісінде араласып, бі­ліс­кен айналасындағы адамдарға аманаттап қалдырып кетті. Кең жүректі, ісіне адал дәрігердің өнегелі өмірі мен ұмытылмас ісін мақтан тұтып, кейінгі ұрпаққа үлгі ететін боламыз. Бүгінде аурухана ұжымы коронавирусқа қарсы күресті жалғастыруда. Провизорлық, инфекциялық стационарда төсек-орындар мен дәрі-дәрмек жеткілікті. Әр адамның қауіпсіздігі қарастырылған. Адамдардың жауапкершілігін арттыру керек. Жасырын жиын, тасада той-томалақ өткізу дегенді мүлде доғару керек. Бүгінгі таңдағы ең басты мәселе осы болып тұр. Әрқайсымыз абай болып, өзімізді өзіміз күтіп, айналадағы жақын адамдардың жағдайын ойлауымыз керек. Бүкіл қауіпсіздік шарасын қолдану керек, – деді аудан әкімі.

– Бала кезімізде ағам Петр екеумізге үйде көбіне әкеміз қарайтын. Анам көбіне жұмыста жүретін. Уақыт деген өмір ғой. Анам қамшының сабындай қысқа ғұмырының көбін ауруханадағы науқастарға арнады. Үйге қатты шаршап келетін. Оған біз де үйреніп кеттік. Біздің басымызға түскен ауыр қайғыға бүкіл ел ортақтасып жатыр. Ел ішіндегі бірлік, бауырмалдық дегенді адам осындайда түсінеді екен. Мемлекет басшысы Қасым-Жомарт Тоқаевтың өзі асыл анашымның еңбегін жоғары бағалап, «Құрмет» орденін беріп жатыр. Бұл – біздің отбасымыз үшін үлкен мақтаныш. Бәлкім анам сияқты медицина қызметкері болмаспын, бірақ өз Отанын шын сүйетін адал азамат болу  –парызым, – деді көпшілік алдында толқи сөйлеген марқұмның қызы Виктория.

Иә, өлгендер орден тақпайды. Бірақ бұл орден қызмет бабында жүріп пандемия құрбанына айналған қайсар медбикеге деген ел құрметіне қойылған ескерткіш.

 

Қостанай облысы,

Жітіқара қаласы